छिमेकी मुलुकसँग नाका जोडिएको क्षेत्रमा बसोबास गर्ने स्थानीयबासीले अनेक समस्या भोग्नुपर्छ । अझ सीमानाका बन्द हुँदा उनीहरु बढी प्रभावित हुने गरेका छन् । यस्तै पीडा भोगिरहेका चीनसँगको सीमा जोडिएका एक दर्जनभन्दा बढी नाका आसपासका बासिन्दाले राहतको सास फेर्न पाएका छन् । कोरोना संक्रमण फैलिने डरले चीन सरकारले २०७६ माघ ५ गतेदेखि बन्द गरेका १४ नाका शनिबारदेखि पुनः सञ्चालन गरिएसँगै नाकाबासीलाई राहत मिलेको हो । शनिबार एक समारोहबीच नेपाल–चीन जोडिएका ती नाका पुनः सञ्चालनको घोषणा गरिएको हो, जसमा संखुवासभाको किमाथांकासहितका नाका रहेका छन् ।
उपप्रधानमन्त्री एवं परराष्ट्रमन्त्री नारायणकाजी श्रेष्ठ र चीनको स्वशासित क्षेत्र तिब्बतका उपाध्यक्ष सिलाम निमाले चीनको छेन्ताङमा शनिबार आयोजित एक समारोहबीच किमाथांकासहित नेपाल–चीन सीमामा रहेका १४ वटै नाका पुनः सञ्चालनमा आएको संयुक्तरूपमा घोषणा गरेका हुन् । किमाथांका नाका खुलेपछि भोटखोलावासी उत्साहित भएका छन् । विगतमा यहाँका बासिन्दाले चिनियाँ बजारबाट खाद्यान्न आयात गर्दै आएका थिए । तर नाका बन्द भएपछि उनीहरुलाई समस्या भएको थियो । भोटखोलावासीलाई तिब्बत प्रवेश गर्न स्थानीयस्तरमा अनुमतिपत्र वितरण गरिएको छ । किमाथांका नाका सदरमुकामदेखि १६२ किलोमिटर टाढा पर्छ ।
रसुवागढी–केरुङ, तातोपानी–झाङ्मु, यारी–पुरान तथा नेचुङ–लिची (कोरला) व्यापारिक नाका यसअघि नै सञ्चालनमा आइसकेका छन् । ताप्लेजुङको टिप्तला नाका पनि शुक्रबारदेखि पुनः सञ्चालनमा आएको छ । उत्तरी क्षेत्रमा रहेका सम्पूर्ण व्यापारिक नाका खुलेसँगै सीमा क्षेत्रमा राज्यको उपस्थिति हुने छ । भन्सार राजस्वमा वृद्धि हुने छ । स्थानीय उत्पादनको बिक्री तथा रोजगार सिर्जना हुने छ ।
सीमानाका खुलेसँगै उच्च हिमाली क्षेत्रका जनताको जीवनस्तरमा ठूलो परिवर्तन ल्याउने छ । कारण नेपालको बजारभन्दा चीनको बजारबाट उनीहरुले लाभ लिँदै आएको विगत ताजै छ । सीमावर्ती क्षेत्रका नागरिकले उत्पादन गरेका चौरीको दूध, घिउ, भेडाको ऊन र जडीबुटीलगायत चिनियाँ बजारमा बिक्री गर्ने तथा चौरी तथा भेडा चरनका लागि चिनियाँ भूभागमा लाँदै आएका थिए । नेपालमा चौँरी तथा भेडाका लागि खर्कको अभाव छ ।
चीनको तिब्बत क्षेत्रमा रहेका खर्कमा उत्तरी सीमावर्ती क्षेत्रका स्थानीयले चौँरी तथा भेडा चराउने गरेका थिए । सीमानाका बन्द भएपछि यसबाटा वञ्चित हुँदै आएकामा अब भने पुनः यी गतिविधि अगाडि बढ्ने भएको छ । दुई देशका जनताबीच सम्बन्ध बिस्तार र व्यापार प्रवद्र्धनमा यसले महŒवपूर्ण भूमिका खेल्ने निश्चित छ ।
