यसपटक प्रतिनिधिसभा सदस्यको निर्वाचन घोषणापछि आठ लाख ३७ हजार ९४ नयाँ मतदाता थपिएका छन् । झन्डै पाँच लाख त राष्ट्रिय परिचयपत्रमार्फतमात्रै मतदाता नामावलीमा जोडिए । निर्वाचन आयोगका अनुसार राष्ट्रिय परिचयपत्रमार्फत चार लाख ९२ हजार एक सय ८० नयाँ मतदाता थपिएका हुन् । यी मतदाता खासमा बयोमेट्रिक्स गर्न आयोग वा आयोगले तोकेको स्थानसम्म जाने जोशजाँगरमा थिएनन् । किनभने लामो लाइन, पट्यारलाग्दो सरकारी प्रक्रियाले जोकोही आजित थिए ।
यसपटक जेन–जी विद्रोह भयो । सरकारमा आएका मन्त्रीहरुले पनि जेन–जी समूहलाई निर्वाचनमा जान उत्साहित ग¥यो । यसअघि निर्वाचनमा गएर पनि देशमा केही परिवर्तन नदेखेकाहरुले मतदाता नामावली दर्ताकै बेला उत्साहजनक काम गरिदिए । जुन अघिल्ला सरकारका नेतृत्वकर्ताले न त सोचेका थिए न त गरेकै थिए । यसले गर्दा युवाहरु चुनावमा जान उत्साहित रहेको प्रमाणित यसैबाट हुन्छ ।
जेन–जी विद्रोहपछि कामबाट चिनिएका नेताहरु पनि राजनीतिक दल दर्ता गर्न पुगेका छन् । आयोगले निर्वाचनको तयारी तीव्र रुपमा गरिरहेको छ । प्रधानमन्त्री सुशीला कार्कीले चुनाव गराएर सरकार छाड्ने बताइरहेकी छन् । यस्तो अवस्थामा शीर्ष दल नेपाली कांग्रेसले पनि चुनावमा भाग लिने निर्णय गरिसकेको छ । लोकतन्त्रको मियो मानिने कांग्रेस शनिबारसम्म यस विषयमा मौन थियो । एमालेले सडकमा रडाको मच्चाइरहेको बेला धेरैजसोले कांग्रेसको निर्णय पर्खिरहेको थियो ।
प्रतिनिधि सभा विघटनपछि अहिले कार्कीको नेतृत्वमा सरकार बनेको छ । यो सरकारको मुख्य काम चुनाव सम्पन्न गराउनु हो । देशलाई संवैधानिक ट्र्याकमा लैजाने मुख्य बाटो चुनाव हो । यसैले सबै दलले अब चुनावी बाटो नै रोज्नु आजको आवश्यकता हो । एमाले अहिले कुनै पनि हालतमा निर्वाचन हुँदैन भनेर सडकमा रोदन गरिरहेको छ । सत्ताको शक्तिमा रहेको बेला जेन–जी विद्रोहले सडकमा पुर्याएको रोष हुन सक्छ ।
तर देश र जनताका लागि अब निर्वाचन नै एकमात्र विकल्प हो । सरकारको तयारी, जेन–जीको उत्साह, कांग्रेसको निर्णयले अब निर्वाचनको वातावरण तय भइसकेको छ । केही कैदी कारागारबाट फरार रहेको र केही हतियार बाहिर रहेको देखाउँदै चुनावको विरोध गर्नुभन्दा अब चुनावी प्रतिस्पर्धामा होमिएर जनतामाझ जाँचिनु एमालेका लागि हितकर छ । लोकतन्त्रको संरक्षणका लागि चुनावी ग्राउन्ड तयार भइसकेको अवस्थामा भाग्नु उचित हैन ।
-1763876747.jpg)
