भक्तपुर- ११ वर्षे नीतिक आचार्यको पहिलो बालकथासंग्रह ‘कङ्गारुको एकता’ सार्वजनिक भएको छ । भक्तपुरको कौशलटारस्थित ग्लोबल पाठशालामा आइतबार आयोजित कार्यक्रममा नेपाल बालसाहित्य समाजका निवर्तमान अध्यक्ष प्रमोद प्रधान, वर्तमान अध्यक्ष विजयराज आचार्य, नेपाल बालवाङ्मय अनुसन्धान केन्द्रका अध्यक्ष अनन्तप्रसाद वाग्ले, हजुरआमा ललिता शर्मालगायतकाले संग्रहको संयुक्त रुपमा सार्वजनिक गरेका हुन् ।
भक्तपुरको कौशलटारस्थित ग्लोबल पाठशालाको कक्षा ५ का छात्र नीतिकको पहिलो बालकथासंग्रहमा ७ वटा बालकथाहरु समावेश छन् । जसमा मातृत्वप्रेम, संवेदना, समाज र मानवलाई प्रस्तुत गरिएको छ ।
पत्रकार सुशीला तामाङले सम्पादन गरेको संग्रहमाथि बाल साहित्यकार तथा पत्रकार नेत्र तामाङले टिप्पणी गरेका थिए । कथाकारले शीर्षकथा ‘कङ्गारुको एकता’भन्दा बाहेक सबैमा मानवीय पात्रलाई केन्द्रमा राखेर निकै मन छुने ढंगबाट कथा सिर्जना गरेका छन् । ‘कथामा चाहिने पात्र निर्माण, संवाद, द्वन्द्व र समाधानको पाटोसमेत निकै बलियो रुपमा आएका छन् । पढ्दा निकै मजा आयो,’ तामाङले भने ।
बालसाहित्य समाजका निवर्तमान अध्यक्ष प्रधानले बालकथाकार आचार्यको आगामी लेखन सिर्जनाका लागि शुभकामना व्यक्त गर्दै कथा सिर्जना गर्न त्यति सहज नभएको धारणा राखे । कथा लेख्नलाई कथाकारले मान्छेको जीवनको अध्ययन गर्नु र मान्छेको जीवनभित्र पस्नुपर्ने बताउँदै पात्रको खोजीमा क्रममा यो क्रम जारी रहने प्रधानले सुनाए ।
आचार्यलाई नेपाल बालसाहित्य समाजका वर्तमान अध्यक्ष आचार्य, नेपाल बालवाङ्मय अनुसन्धान केन्द्रका अध्यक्ष वाग्ले लगायतकाले बधाई दिँदै आगामी लेखन यात्राका लागि शुभकामना व्यक्त गरे ।
उक्त अवसरमा नीतिकको कथा संग्रहमा रहेको मोबाइल लतको नाट्य प्रस्तुतिसमेत गरिएको थियो। कार्यक्रमको अवसरमा मध्यपुर थिमि नगरपालिका वडा ३ का वडाध्यक्ष कृष्णहरि आचार्यले नीतिकको लेखन कार्यको प्रशंसा गरेका थिए।
