मंगलबार नेकपा एमालेले निर्वाचन आयोगमा निर्वाचन प्रयोजनका लागि दल दर्ता गरेको छ । फागुन २१ गते निर्धारण गरिएको प्रतिनिधि सभा निर्वाचनमा भाग लिन एमालेले दल दर्ता गरेसँगै माहोल तातिएको छ । एमालेले यसअघि अन्तरिम सरकारले निर्वाचन गर्नै नसक्ने ठोकुवा गर्दै आएको थियो । भदौ २३ र २४ गतेको प्रदर्शनका क्रममा प्रहरी चौकीबाट लुटिएका हतियार र कारागारबाट भागेका कैदी देखाउँदै एमालेले निर्वाचन हुनै नसक्ने दाबी गरेको थियो ।
तर जब नेपाली कांग्रेसले निर्वाचनमा भाग लिने औपचारिक निर्णय गर्यो एमालेलाई एकाएक निर्वाचनमा भाग लिनुपर्ने दबाब प¥यो । लोकतान्त्रिक प्रणाली स्वीकारेको एमालेले बाहिर बसेर सरकारलाई जुन धम्कीपूर्ण भाषामा चेतावनी दिइरहेको थियो त्यो शोभनीय थिएन । तर अब निर्वाचनमा भाग लिनका लागि आयोगमै दल दर्ता गरिसकेको हुनाले मुलुक निर्वाचनमय बनेको छ । एमालेको यो निर्णय स्वागतयोग्य छ । जेन–जी विद्रोहपछि ताजा जनादेश लिनका लागि राष्ट्रपति रामचन्द्र पौडेलले निर्वाचन नै प्रमुख बाटो भएको बताउँदै आएका छन् । सुशासनका लागि नव युवाहरुले विद्रोह गरेका थिए । यो विद्रोहले दलमा, जनतामा र मतदातामा एकैपटक अभूतपूर्व चेत खुलेको छ ।
निर्वाचनमा भाग लिनका लागि खासै रुची नदेखाउने युवा पुस्ता यसपटक मतदाता नामावली दर्ता प्रक्रियामा उत्साहपूर्ण तरिकाले सहभागी भएका छन् । प्रविधिको प्रयोग गर्दै राष्ट्रिय परिचयपत्रमा लिएको बायोमेट्रिकबाटै मतदाता नामावलीमा नाम दर्ता हुनु यसपटकको लागि खुसीको कुरा रह्यो । निर्वाचनका लागि अर्को खुसीको कुरा हो अन्तरिम सरकारकै तदारुकता । शुरुमा पुनर्निर्माणदेखि विभिन्न मुद्दामा अलमलिएको यो सरकार आफै निर्वाचन गराउन लागिपरेको छ । सरकारकै मन्त्रीले पनि दल खोलेर निर्वाचनको वातावरण बनाएको हुनाले एककिसिमको माहोल बनेको हो ।
यो बीचमा अझै पनि निर्वाचन हुँदैन भन्ने हल्ला नचलेका हैनन् । तर यस्ता खालका शंकाउपशंका भइरहन्छन् । सरकारलाई झक्झक्याउन पनि यसखाले खबरदारी आवश्यक छ । त्यसैले कांग्रेस एमाले जो सरकारमा थिए, अहिले सडकमा आइपुगेका छन् । उनीहरु नै निर्वाचनमा जान तयार भएकाले निर्वाचनका वातावरण बनेको छ । अब जेन–जीदेखि फागुन २१ मा सहभागी हुन तयार बनेका नयाँ दल पनि उत्साहित देखिएका छन् । पक्कै पनि निर्वाचन आयोगले बनाएको कार्यतालिकाअनुसार निर्वाचनको कार्यक्रमहरु अघि बढ्दै जानेछ र आशा गरौं तोकिएकै समयमा निर्वाचन सम्पन्न हुनेछ ।
