काठमाडाैं - उमेरले २२ वर्ष मात्र पुगेका अविष्कार त्रिपाठीले ५० जिल्ला घुमेका छन् । सानै उमेरदेखि नेपाल चिनाउँदै हिँड्ने युवाकाे रुपमा परिचित बनेका उनले ५० जिल्लासम्मको यात्राबाट पर्यटन प्रवर्द्धनमा योगदान दिएका छन् ।
सन् २०२१ देखि २०२५ सम्मको अवधिमा त्रिपाठीले ५० भन्दा बढी जिल्लाको भ्रमण गरिसकेका छन्। पछिल्ला वर्षहरूमा नेपालको प्राकृतिक सौन्दर्यता र सांस्कृतिक विविधतालाई विश्वसामु पुर्याउने अभियानमा उनी सक्रिय छन्।
सानै उमेरदेखि देशका रमणीय स्थलहरू, हिमाली दृश्य, झरना, तालतलैया र स्थानीय संस्कृतिको झल्को क्यामेरामा कैद गर्दै उनी निरन्तर यात्रामा निस्कि नै रहन्छन्।
उनका भिडियोहरूले विशेषगरी युवापुस्तामा आन्तरिक पर्यटनप्रतिको आकर्षणहरु प्रशस्त छन् ।त्रिपाठीले भन्छन्,‘नेपालमा अनगिन्ती सौन्दर्यता लुकेका छन्, म ती सौन्दर्यलाई विश्वका मानिसहरूसामु पुर्याउन चाहन्छु,’।
उनका भिडियोहरूले केवल मनोरञ्जन मात्र नभई देशप्रेम, वातावरण संरक्षण र स्वदेशप्रतिको गर्वको सन्देश समेत बोकेको पाइन्छ।
रहरकै रहरमा देश घुम्न सुरु गरेका त्रिपाठी अहिले यो यात्रालाई पेशाको रूपमा लिइरहेका छन्। १९ वर्षकै उमेरमा ट्रेकिङ गाइडको लाइसेन्स प्राप्त गरेका उनले अहिले देशभर आउने पर्यटकहरूलाई विभिन्न गन्तव्यमा घुमाउने कामसमेत गर्दै आएका छन्।
उनी भन्छन्, “यदि राम्रो स्रोत र साधन पाएँ भने म अझ धेरै ठाउँहरू देखाउँदै नेपाललाई विश्वसामु चिनाउनेछु, किनभने हाम्रो देशमा पर्यटनको अपार सम्भावना छ।”
आफ्नै खर्चमा यात्रा गर्दै आएका त्रिपाठीले “WONDERFUL NEPAL” नामक सामाजिक सञ्जाल पेज बनाए सञ्चालन गर्दै आएका छन् । उनकाे सञ्जाल पेजलाई हाल १ लाख २३ हजारभन्दा बढीले पछ्याइरहेका छन्।
उनले त्यहाँ नेपालका प्राकृतिक र सांस्कृतिक सौन्दर्य झल्काउने आकर्षक सामग्रीहरू नियमित रूपमा पस्कने काम गर्दै आएका छन्।
यस्ता युवा प्रतिभाहरूले नेपालको पर्यटन क्षेत्रमा ईट्टा थपेर नयाँ उत्साह र सम्भावना थपिरहेका छन्।
