मुलुकको निर्णायक शक्ति नेपाली कांग्रेस अहिले आन्तरिक किचलोका कारण अनिर्णयको बन्दी बन्न पुगेको छ । गुटगत किचलोले महाधिवेशनको कार्यतालिका ल्याउने सकेको छैन । असोज २८ बाट शुरु भएको केन्द्रीय समिति निचोडमा पुग्न पटकपटक प्रयास गर्दा पनि टस न मसको स्थिति छ ।
निर्वाचन घोषणा भइसकेको अवस्थामा लोकतान्त्रिक दलहरुले कांग्रेसको निर्णय पर्खेर बसेको छ । माघ ११ गते राष्ट्रिय सभाको निर्वाचन हुँदैछ । फागुन २१ गते प्रतिनिधि सभाको । निर्वाचन प्रयोजनका लागि निर्वाचन विरोधी दलको रुपमा हेरिएको एमाले राष्ट्रिय सभा निर्वाचनका लागि आयोगमा पुगिसकेको छ । उसले ११औं महाधिवेशनको माहोल पनि तयार गरिसकेको छ ।
तर कांग्रेस जो प्रजातन्त्रको अगुवाई गर्ने दलको रुपमा हेरिरहेको छ, अहिले कुहिरोको काग झैं बनिरहेको छ । अहिले कांग्रेस चारतिर बाँडिएको छ । कोही निर्वाचनअघि जसरी पनि महाधिवेशन हुनुपर्छ भनेर भेला गरिरहेका छन् भने कोही यस्तो हुनै सक्दैन भनेर समूह बनाएर हिँडेका छन् । कुनै पक्षले विशेष महाधिवेशनमा जोड दिँदै अब नियमितको कार्यतालिका स्वीकार नगर्ने अडान जारी राखेका छन् ।
मुलुकका हरेक परिवर्तनलाई संस्थागत गर्न कांग्रेसले अगुवाई लिँदै आएको इतिहास छ । यसपटक भदौ २३ र २४ गते जेन–जी पुस्ताले सुशासन माग्दै आन्दोलन गरे । सत्तामा कांग्रेसले नै अडाएको एमाले थियो । एमाले अध्यक्ष केपी शर्मा ओलीको अराजक शैलीमा कांग्रेसले अंकुश लगाउन नसक्दा धेरै थोक कांग्रेसले नै गुमायो । कांग्रेस यसपटक पहिलो दल बनेको थियो । तर पनि सत्ताको नेतृत्व गर्न सकेन ।
‘वेटिङ प्राइममिनिस्टर’का रुपमा हेरिएका सभापति शेरबहादुर देउवा आफ्नै निवासमा कुटिए । आफू कुटिएपछि देउवाले असोज २८ गते उपसभापति पूर्णबहादुर खड्कालाई कार्यवाहकको जिम्मेवारी दिएका थिए । खड्काकै नेतृत्वमा सानेपामा पछिल्लो परिस्थितिबारे महिना दिन बहस ग¥यो । त्यसपछि निर्णय सार्वजनिक गर्न बोलाइएको बैठक कात्तिक २८ देखि पटकपटक सर्दै आएको छ । बिहीबार बस्ने भनिएको बैठक पनि अन्तिम समयमा आएर भोलिका लागि सारिएको छ ।
अहिलेको अन्तरिम सरकार गैरदलीय सरकार हो । यो सरकार संक्रमणकालका लागि बनेको हो । त्यसैले प्रतिनिधि सभाको निर्वाचन नै संवैधानिक सर्वोच्चता स्थापना गर्ने आधिकारिक बाटो हो । यसमा सहभागी भएर अरु दललाई पनि यही मार्गमा ल्याउने काम कांग्रेसको हो । अब नअलमलिकन कांग्रेस चाँडो निर्णयमा पुगोस् ।
