पछिल्लो दिनमा नेपाल प्रहरीको आत्मबल गिर्दो छ । दिनहुँका आन्दोलन र प्रदर्शनमा बर्दीमा खटिएका प्रहरीमाथि प्रदर्शनकारीले गर्ने निरन्तर दुव्र्यहारका कारण प्रहरीको मनोबल खस्किएको देखिन्छ । प्रदर्शन र आन्दोलनहरुमा ढुंगामुढा हुने, प्रदर्शनकारीबाट दुव्र्यवहार हुने, नेतृत्वकर्ताले कुटपिट गर्नुका साथै धम्क्याउने काम निरन्तर गरिरहेको पाइन्छ ।
डिजिटल प्रविधिको प्रवेशसँगै अहिले हरेकसँग मोबाइल क्यामराको पहुँच छ । प्रदर्शनकारीबाट हुने गरेका दुव्र्यहार सामाजिक सञ्जालमा पनि सार्वजनिक हुँदा प्रहरीको मनोबल झनै कमजोर हुने गरेको देखिन्छ । प्रहरीलाई कुनै अधिकार नदिने तर प्रदर्शनकारीले भने हप्कीदप्की गर्ने किसिमको कार्य बढ्दो छ ।
जेन–जी विद्रोहपछि विभिन्न स्वार्थ समूहले प्रहरीमाथि निशाना नै बनाउन थालेको देखिन्छ । उक्त विद्रोहको क्रममा पनि प्रहरीलाई कुटपिट गर्ने, उनीहरुको बर्दी लगाएर प्रहसन गर्ने, हतियार लुट्नेजस्ता कार्य प्रदर्शनकारीले गरेका थिए । राज्यको सुरक्षा संयन्त्रमा रहेर काम गर्दा सबैभन्दा ठुलो प्रश्न प्रहरीमाथि उठ्छ नै । सुरक्षा नहुँदा पनि प्रहरीमाथि प्रश्न उठ्न, प्रदर्शनकारीमाथि दमन हुँदा पनि प्रश्न उठ्छ । यो प्रहरीको दायित्व हो । खासमा प्रहरीलाई उक्त समय कर्तव्य पालना गराउने नेतृत्वलाई अनुसन्धानको दायरामा ल्याउनुपर्नेमा हामीकहाँ जिउज्यानको माया मारेर दंगमा उत्रेका जवानहरुलाई नै कारबाहीमा तानिन्छ ।
अन्तरिम सरकारको मुख्य जिम्मेवारी फागुन २१ गते प्रतिनिधि सभाको निर्वाचन गराउनु हो । यसका लागि देशभर प्रहरी तम्तयार अवस्थामा राख्नुपर्छ । हुन त सरकारले निर्वाचन प्रयोजनका लागि सेना परिचालन गर्ने तयारी गरेको छ । यद्यपि मतदानस्थल र मतपेटिका सुरक्षामा प्रहरी नै खटिनुपर्ने हुन्छ । सेनाले बाहिरी क्षेत्र कभर गर्ने गरी सुरक्षा दिँदा मतदानस्थल, मतपेटिका सुरक्षादेखि मतगणनाको लामो प्रक्रियामा प्रहरी संलग्न हुनुपर्छ ।
यस्तो अवस्थामा राजनीतिक दलका प्रतिनिधिबाट प्रहरीमाथि दुव्र्यवहार हुन सक्ने सम्भावनाहरु उत्तिकै रहन्छ । कुनै बुथमा अप्रिय घटना हुँदा निर्वाचन नै बिथोल्ने सम्भावना हुन्छ । त्यसैले पनि यस्तो विषयमा सरकार गम्भीर हुनुपर्छ । सरकारमा रहेका मन्त्रीदेखि नेताहरुको दुव्र्यहार सहेर प्रहरीले काम गर्न सक्दैन । प्रहरीमा दिनानुदिन आकर्षण पनि घट्दो छ । यसको मुख्य कारण सुविधाहरुको अपग्रेड नहुनु पनि हो । यस्तो अवस्थामा अबका दिनमा सरकारले र प्रहरी मुख्यालयले प्रहरीको मनोबल बढाउने गरी प्याकेज ल्याउनुपर्ने आवश्यक छ ।
