मुलुकबाट दैनिक हजारौं यात्रु बाहिरिने र मुलुक भित्रिने त्रिभुवन अन्तर्राष्ट्रिय विमानस्थल बेलाबेला चर्चामा आइरहन्छ । कहिले सुनलगायत अवैध सामानको तस्करी, कहिले मानव तस्करी त कहिले ‘सेटिङ’ तथा अध्यागमन कर्मचारीको रुखो बोलीवचन र व्यवहार । कर्मचारीबाट यात्रुलाई अनावश्यक दुःख दिने प्रवृत्तिले मुलुकको छवि नै धमिल्याउने काम गरेको थियो । पछिल्लोपटक सेटिङ गरेर भिजिट भिसामा मानव तस्करीको घटनामा अध्यागन कार्यालयका प्रमुख नै अख्तियारको फन्दामा परेपछि मुलुकको राजनीति नै तरंगित बनाएको छ । उक्त प्रकरणको कनेक्सन गृह मन्त्रालयसम्म जोडिएपछि प्रतिपक्षी दलहरुले लामो समय संसद् चल्न दिएनन् । प्रमुख प्रतिपक्षी दल नेकपा माओवादी केन्द्रले सत्तापक्षसँग सम्झौता गरे पनि राष्ट्रिय स्वतन्त्र पार्टी र राष्ट्रिय प्रजातन्त्र पार्टी सोही मुद्दालाई लिएर अझै संसद् बैठक बहिस्कारमा उत्रिरहेका छन् ।
यही घट्नाबाट पाठ सिकेर हुनुपर्छ, त्रिभुवन अन्तर्राष्ट्रिय विमानस्थल अध्यागमन कार्यालयले आफ्ना कर्मचारीका लागि शुक्रबारदेखि नैतिक संहिता लागू गरेको छ । अध्यागमन सेवालाई प्रभावकारी बनाउने उद्देश्यले नैतिक संहिता बनाई लागू गरिएको बताइएको छ । अध्यागमन प्रशासनसँग सम्बन्धित अन्तर्राष्ट्रिय मूल्य, मान्यता तथा सिद्धान्तअनुरूप कर्मचारीलाई विद्यमान राष्ट्रिय कानुन, सामाजिक तथा सांस्कृतिक मूल्यप्रति जिम्मेवार र संवेदनशील बनाई कर्मचारीको असल व्यक्तिगत, पदीय एवं पेसागत आचरणका साथै व्यवहारका माध्यमबाट आमनागरिकले अनुभूति गर्नेगरी सेवा प्रवाहलाई छिटोछरितो, निष्पक्ष, पारदर्शी, वस्तुनिष्ठ, अनुमानयोग्य र नतिजामूलक बनाउन आचारसंहिता लागू गरिएको कार्यालयको भनाइ छ ।
कार्यालयले जारी गरेको संहिताअनुसार अब अध्यागमन कर्मचारीले प्रस्थान गर्ने यात्रुलाई कम्तीमा शुभयात्रा (ह्याब अ नाइस जर्नी) भन्ने, नेपालभित्र प्रवेश गर्नेलाई कम्तीमा नेपालमा स्वागत छ (वेलकम इन नेपाल) भन्नुपर्ने छ । साथै, कम र आवश्यक प्रश्नमात्र गर्ने नैतिक संहितामा उल्लेख छ । खाडी मुलुकहरूमा श्रम÷काम गर्न प्रस्थान गर्दा सम्मानयुक्त शब्दहरू प्रयोग गर्ने, रूखो व्यवहार नगर्ने, बोलीवचनमा मिठासपना दिने, देशको मुहार झल्कने ठाउँ भएकाले पर्यटकहरूसँग बोलीवचन र हाउभाउले आत्मीयता प्रदान गर्नेलगायत विषयहरू उल्लेख गरिएका छन् ।
उक्त नैतिक संहिताअनुरूपको व्यवहार देखिएको/नदेखिएको यात्रुहरूले तत्कालै व्यक्त गर्न हाल कार्यालयको १५ वटा कक्षमा आफूले प्राप्त गरेको सेवाको सन्तुष्टि व्यक्त गर्नेगरी सर्वेक्षणको पनि व्यवस्था गरिएको कार्यालयले जनाएको छ । सर्वेक्षणमा स्वेच्छिक रूपमा आफूले प्राप्त गरेको सेवा तथा व्यवहारका विषयमा राय व्यक्त गर्न सकिनेगरी आवश्यक व्यवस्था मिलाइएको विभागले शुक्रबार सूचना जारी गरी जानकारी गराएको छ ।
अध्यागमन कार्यालयको यो संहिता साँच्चै व्यवहारमा लागू होला त ? यो हेर्न बाँकी नै छ । यद्यपि, कार्यालयको यो प्रयासबाट अन्तर्राष्ट्रिय विमानस्थलमा यात्रुले अनावश्यक रुपमा बेहार्नुपर्ने सास्ती र दुव्र्यवहार हट्ने अपेक्षा गर्न सकिन्छ । तर, नैतिक संहिता कडाइका साथ लागू हुनुपर्छ । अन्यथा यो अर्थहीन बन्ने निश्चित छ ।
