नेपालीहरुले धमाधम खेतबाट धान भित्र्याउने समय हो यो । कोदोबाली पनि पाक्ने क्रममा छ । यही बेला हिमाली क्षेत्रमा भारी हिमपात भएको छ भने पहाडी क्षेत्रमा हल्का वर्षा भएको छ । आगामी बिहीबारदेखि शनिबारसम्म भारी वर्षा हुने पूर्वानुमानसमेत गरिएको छ । मुख्यबाली धान भित्र्याउने समयमा यसरी बेलाबेला वर्षा हुँदा धेरै क्षति हुने गरेका घटना पहिले पनि हामीले भोग्दै आएको हो । काट्दै गरेको धान डुबेर क्षति पुगेका, पाकेर भित्र्याउन ठिक्क पारेको धान ढलेर क्षति पुगेकोबारे हामी जानकार नै छौं ।
यसपटक जल तथा मौसम विज्ञान विभागको मौसम पूर्वानुमान महाशाखाले दुई दिनअगाडि नै वर्षा हुनसक्ने भन्दै सबै क्षेत्रमा सतर्कता अपनाउन आग्रह गरिसकेको छ । यस्तो अवस्थामा धान भित्र्याउने तयारीमा रहेका किसानहरुले बेलैमा सावधानी अपनाउनुपर्छ । अहिले विषेशगरी बागमती, मधेस र कोशी प्रदेशको मौसम प्रभावित हुने देखिन्छ । यो अवधिमा अत्यधिक वर्षा भएमा बागमती, कमला, कोशी, कन्काई नदी र यी नदीका सहायक नदीहरूमा बहाब उल्लेख्य बढ्ने र सतर्कता तह आसपास पुग्न सक्ने आकलन गरिएको छ ।
विशेषगरी बागमती प्रदेशका काठमाडौं उपत्यका, काभ्रे, सिन्धुपाल्चोक, दोलखा, मकवानपुर, चितवन र सिन्धुली, मधेस प्रदेशका बारा, पर्सा, सर्लाही, रौतहट, महोत्तरी, धनुषा, सप्तरी र कोशी प्रदेशका संखुवासभा, ताप्लेजुङ, पाँचथर, तेह्रथुम, भोजपुर, धनकुटा, इलाम, झापा, मोरङ, सुनसरी जिल्ला भई बहने स–साना नदीहरूमा आकस्मिक बहावको सम्भावना उच्च रहेको विभागले जनाएको छ ।
वर्षा र हिमपातले पर्यटन क्षेत्रमा पनि उत्तिकै प्रभाव पार्ने देखिन्छ । मंगलबार बिहानबाट परेको हिमपातका कारण कतिपय पर्यटक अलपत्र परेका छन् । उनीहरु विभिन्न क्षेत्रमा फसेका छन् । तिहारको बिदा मनाउने क्रममा रहेकाहरु, यही बेला उत्कृष्ट मौसम भएको भन्दै आन्तरिक पर्यटकको घुइँचो लागेको छ मुस्ताङ मनाङमा । ती क्षेत्र अहिले हिउँ परेका कारण प्रभावित बनेको छ । त्यहाँ फसेका पर्यटकको स्वास्थ्यमा गम्भीर असर पर्न सक्छ ।
पहिरो तथा खराब मौसमका कारण सडक र हवाई यातायातसमेत प्रभावित हुने देखिन्छ । यसले पनि यात्रीहरुमाथि असर पुग्ने देखिन्छ । यसैले यस्तो बेला सरकारले विपद् पूर्वतयारी गर्नु आवश्यक छ नै सर्वसाधारणले पनि आफ्नो ठाउँबाट सकेको सहयोग गर्नुपर्दछ । आकस्मिक मौसम बदलावबाट हुने क्षति सबै मिलेर सकेसम्म रोकौं ।
