काठमाडाैं - नेपालले युएईसँग अल अमेरतस्थित ओमान क्रिकेट एकेडेमी टर्फ १ मा सुपर सिक्स अन्तर्गतको पहिलो खेल प्रतिद्वन्दी युएईसँग खेल्ने भएकाे छ ।
ओमानमा जारी आइसिसी टी २० विश्वकप एसिया एन्ड इएपी छनोटमा समूह विजेता हुँदै सुपर सिक्स मा पुगेको नेपालले आइतबार अपराह्न सवा ४ बजे युएईसँग अल अमेरतस्थित ओमान क्रिकेट एकेडेमी टर्फ १ मा सुपर सिक्स अन्तर्गतको पहिलो खेल चिर परिचित प्रतिद्वन्दी युएईसँग खेल्ने भएकाे हाे ।
कुवेत विरुद्ध ५८ रनको र जापान विरुद्ध पाँच विकेटको जित निकाल्दै नेपाल समूह बी को विजेता हुँदै सुपर सिक्समा प्रवेश गरेको हो ।सुपर सिक्समा आज नेपालले अति नै महत्वपूर्ण खेल आफ्नो चिरपरिचित प्रतिद्वन्दी युएइसँग खेल्दैछ ।नेपाल र युएईबीच अहिलेसम्म १० वटा टी२० अन्तर्राष्ट्रिय खेलहरु भएका छन्।
ती १० खेलमध्ये दुवै टोली ५÷५ खेलमा विजयी भएका छन्।पछिल्ला ५ खेलको नतिजामा नेपाल ३ खेलमा विजयी भएको छ भने युएईले २ खेलको नतिजा आफ्नो नाममा लेखाउन सफल भएको छ। नेपाल र युएईबीच पछिल्लो खेल सन् २०२४ को अप्रिल १९ मा भएको थियो। सो खेलमा भने नेपाल ६ विकेटले पराजित भएको थियो। ओमानमै भएको एसिसी प्रिमियर कपको यो सेमिफाइनल खेलमा युएईसँग पराजित भएसँगै नेपालको एसिया खेल खेल्ने यात्रामा झड्का लागेको थियो।
त्यसअघि नेपाल र युएईबीच सन् २०२३ मा ४ वटा टी२० अन्तर्राष्ट्रिय खेल भएका थिए। ४ मध्ये नेपाल ३ खेलमा विजयी भएको थियो। नेपालले सन् २०२३ को नोभेम्बरमा मुलपानीमा भएको विश्वकप छनोटको सेमिफाइनल खेलमा युएईलाई नै ८ विकेटले हराएर आइसिसी टी२० विश्वकप २०२४ मा सहभागी भएको थियो।
सन् २०२३ कै अक्टोबरमा भएको थ्री नेसन सिरिजमा भने युएईले नेपाललाई कीर्तिपुरमा ४ विकेटले पराजित गरेको थियो। सिरिजका अघिल्ला दुई खेलमा भने नेपाल ५ विकेट र ७ विकेटले विजयी भएको थियो । आज युएईविरूद्धको खेल नेपालका लागि अति नै महत्वपूर्ण हुनेछ । किनभने युएईलाई आज हराएमा नेपालको विश्वकपमा छनोट हुने सम्भावना बढ्नेछ। आजको हारले भने नेपाललाई थप दबाव बढ्ने छ।
नेपाल सुपर सिक्समा प्रवेश गर्दा दुई अंक लिएर प्रवेश गरेको छ। युएइले पनि सुपरसिक्समा प्रवेश गर्दा दुई अंकले लिएर प्रवेश गरेको छ। त्यस्तै ओमनले पनि सुपरसिक्समा प्रवेश गर्दा दुई अंक लिएर प्रवेश गरेको छ। यदि नेपाल युएईलाई हरायो भने नेपालको चार अंक हुनेछ भने युएईको दुई अंक हुनेछ। त्यसपछाडि नेपालले अन्य कुनै एक टिमलाई राम्रो नेट रनरेटका आधारमा हराए नेपाल विश्वकप छनोटमा लगभग पक्कापक्की रूपमा सुरक्षित हुनेछ ।
समूह चरणको खेलमा नेपालले कुवेत र जापानलाई हराएको थियो। नेपाल रहेको समूह बी बाट जापान पनि सुपर सिक्समा पुगेको छ। आफ्नै समूहबाट आएको टोलीबीच भने सुपर सिक्समा खेल खेलाइने छैन।अब सुपर सिक्स मा आफ्नो समूहबाट आएका बाहेकका चार टोलीसँग प्रतिस्पर्धा गर्नु पर्नेछ। दोस्रो खेलमा नेपालले कतारसँग सोमबार खेल्दा तेस्रो खेलमा बुधबार घरेलु टोली ओमानसँग प्रतिस्पर्धा गर्नेछ।अन्तिम खेलमा नेपालले सामोआसँग शुक्रबार प्रतिस्पर्धा गर्नेछ।
सुपर सिक्सका शीर्ष तीन टोलीले आगामी वर्षको फेब्रुअरी र मार्चमा भारत र श्रीलंकामा आयोजना हुने आइसिसी टी२० विश्वकप २०२६ मा मा स्थान पक्का गर्नेछन्। शीर्ष तीन टोलीमा परेमा नेपाली टोली लगातार दोस्रो पटक र समग्रमा तेस्रो पटक आइसिसी टी २० कपमा छनोट हुनेछ।
