काठमाडौं – नेपालले टी–२० विश्वकप छनौटमा ओमनसँग आज खेल्ने भएकाे छ । ओमानमा जारी आइसिसी टी-२० विश्वकप एसिया एन्ड इएपी छनोटमा सुपर सिक्स अन्तर्गतको खेलमा नेपालले घरेलु टोली ओमनसँग खेल्ने भएकाे हाे ।
उक्त खेल नेपाली समयअनुसार आज राती ८:४५ बजे अल अमेरतस्थित ओमान क्रिकेट एकेडेमी टर्फ १ मा खेल्ने भएकाे छ । सुपर सिक्समा नेपाल र ओमान दुवै टोलीले अहिलेसम्मका दुई-दुई खेल जितेर समान ६९६ अंक जोडेका हुन् । उत्कृष्ट नेट रनरेटका आधारमा ओमान पहिलो स्थानमा र नेपाल दोस्रो स्थानमा छ । आजको खेल जित्ने टोलीको आगामी टी–२० विश्वकपको लागि छनोट यात्रा लगभग पक्का हुनेछ ।
सुपर सिक्सको पहिलो खेलमा युएई विरुद्व नेपालले १ रनको रोमाञ्चक जित हासिल गरेको थियो। सुपर सिक्सकै दोस्रो खेलमा कतारलाई ५ रनले हराउदै नेपालले विश्व कपको लागि बलियो दावेदारको रुपमा उभ्याएको थियो।
नेपाल र ओमनबीच अहिलेसम्म आठ वटा टी–२० अन्तर्राष्ट्रिय खेलहरु भएका छन्। ती आठ खेलमध्ये पाँच खेलमा नेपाल विजयी भयको छ भने ओमन तीन खेलमा विजयी भएको छ। नेपाल र ओमनबीचको पछिल्ला तीन खेलको हेड टु हेड नतिजा हेर्ने हो भने नेपाल ओमनभन्दा बलियो देखिन्छ , जसमा नेपाल दुई खेलमा विजयी भएको छ भने ओमनले एक खेलको नतिजा आफ्नो नाममा लेखाउन सफल भएको छ ।
नेपाल र ओमन को पछिल्लो खेल सन् २०२४ को अक्टुवर २मा प्ले लिफ क्रिकेट ग्राउण्ड क्यानडामा भएको थियो। सो खेलमा नेपालले ओमनलाई ५६ रनले पराजित गरेको थियो। क्यानडामै सेप्टेम्बर २९ मा भएको ओमन र नेपालबीचको नतिजा ओमनले ३७ रनको फराकिलो अन्तरले नेपाललाई सुम्पेको थियो।
त्यसअघि नेपाल र ओमनबीच सन् २०२३ नोभेम्बर ५ भएको आइसिसी टी –२० विश्वकपको एसिया छनौटको फाइनल खेलको नतिजा नेपालले सुपर ओभरमा ओमनलाई सुम्पिदा घरेलु मैदानमा कप जित्ने सपना चक्नाचुर भएको थियो ।
आज ओमानलाई हराएमा नेपाल अपराजित रहँदै एक खेलअगावै विश्वकपका लागि छनोट हुनेछ । यसैगरी ओमन पनि नेपाललाई पराजित गर्दै शीर्ष एक स्थानलाई सुरक्षित बनाइ सिधै विश्वकपमा पुग्न चाहन्छ । सुपर सिक्समा नेपाल र ओमान मात्र अहिलेसम्म अपराजित टोली हुन्। त्यसैले आज राति हुने यो खेल निकै प्रतिस्पर्धात्मक र रोमाञ्चक हुने विश्वास छ ।
आजको खेल नेपालले हारेमा विश्वकपमा पुग्न नेपालले शुक्रबार हुने सुपर सिक्सको अन्तिम खेलमा सामोयालाई हराउनु पर्नेछ। अन्तिम खेलमा नेपालले सामोआसँग शुक्रबार प्रतिस्पर्धा गर्नेछ।
विश्व टी–२० क्वालिफायरको सुपर सिक्स चरणअन्तर्गत आज पहिलो खेलमा जापान र कतार बिहान ११:४५ बजे आमनेसामने हुनेछन्।जापान कतारलाई हराउदै आफ्नो विश्व कपको यात्रा थप बलियो बनाउन चाहन्छ । त्यसपछि दिउँसो ४:१५ बजे हुने दोस्रो खेलमा सामोआ र युएई भिड्नेछन्। युएई आज आप्नो सुपर सिक्सको हारको यात्रालाई बिट मार्न चाहन्छ ।
सुपर सिक्सका शीर्ष तीन टोलीले आगामी वर्षको फेब्रुअरी र मार्चमा भारत र श्रीलंकामा आयोजना हुने आइसिसी टी–२० विश्वकप २०२६ मा मा स्थान पक्का गर्नेछन्। अहिलेसम्मको नतिजालाई हेर्ने हो भने शीर्ष ३ मा पर्न ओमन,नेपाल,जापान र युएईबीच कडा प्रतिस्पर्धा रहेको देखिन्छ।
