इजरायल–इरानबीचको द्वन्द्व तत्काल रोकिने सम्भावना देखिँदैन । बरु दुवैपक्ष एकअर्काविरुद्ध थप आक्रामक बनेका छन् । मिसाइल आदानप्रदानको क्रम तीव्र बनेको छ । यसले द्वन्द्व लम्बिने संकेत त गरेको छ नै, ती देशमा रहेकाहरुको सुरक्षा थप संवेदनशील बन्ने देखिन्छ । यही आकलन गर्दै प्रायः मुलुकहरुले आफ्ना नागरिकलाई उद्धार गरेर स्वदेश फर्काउन थालेका छन् । छिमेकी मुलुक भारतले पनि इरानबाट आफ्ना विद्यार्थीहरुलाई फर्काउने कार्य सुरु गरिसकेको छ ।
यहीबीच नेपाल सरकारले पनि इजरायल र इरानमा रहेका नेपालीहरुको सुरक्षा र उद्धारका लागि तयार रहेको बताएको छ । परराष्ट्र मन्त्रालयले इजरायलबाट नेपाल फर्कन चाहने र इरानमा रहेकाहरुको उद्धार गर्न तयारी अवस्थामा रहेको बताएको हो । तर, परराष्ट्रले नै शनिबार भने इरानमा रहेका नेपालीलाई उद्धार गरिदिन भारतसँग आग्रह गरेको छ । यसले फेरि सरकारको क्षमतामाथि प्रश्न उठाएको छ । उद्धारका लागि तयार छ भन्ने, फेरि भारतसँग गुहार माग्ने कार्यले प्रश्न उठाएको हो ।
यद्यपि, अन्य कुरामा विवाद गरेर विलम्ब गर्नुभन्दा जोखिम क्षेत्रमा रहेका नेपालीहरुलाई जुनसुकै उपाय लगाएर उद्धार गर्नु अहिलेको आवश्यकता हो । चाहे त्यो भारतको सहयोग लिएर होस् या आफ्नै संयन्त्र परिचालन गरेर । इजरायलमा जिटुजी प्रणालीमार्फत नेपालीहरु रोजगारीका लागि पुगेका छन् । यसबाहेक व्यक्तिगत श्रम स्वीकृति लिएर पनि त्यहाँ नेपालीहरु पुगेका तथ्यांक छ । परराष्ट्र मन्त्रालयका अनुसार हाल इजरायलमा करिब पाँच हजार ५०० र इरानमा करिब १२ जना नेपाली रहेका छन् । उनीहरु सबैजना हालसम्म सुरक्षित रहेका छन् । इजरायलमा रहेका अधिकांश नेपालीहरु फर्कने मुडमा देखिएका छैनन् । उनीहरुले अहिलेसम्म सुरक्षित रहेको र नेपाल फर्कन नचाहेको सामाजिक सञ्जालमार्फत सार्वजनिक गर्दै आएका छन् ।
दुई मुलुकबीच द्वन्द्व चर्किएसँगै नेपालबाट इजरायलमा श्रमिक पठाउने कार्य रोकिएको छ । द्वन्द्वग्रस्त अवस्थामा त्यहाँ पठाउनु जोखिम हुन्छ नै । त्यसैले तत्काललाई ‘होल्ड’ गर्नु नै बुद्धिमानी हुन्छ । नेपाली नागरिकको सुरक्षाका विषयमा चासो व्यक्त गर्दै परराष्ट्र मन्त्रालयले कतार र इजरायलमा रहेका राजदूतावासहरुलाई निर्देशन दिएको छ ।
परराष्ट्रमन्त्री डा. आरजु राणा देउवाले तेल अभिभ र कतारको दोहास्थित नेपाली राजदूतहरुलाई नेपालीको सुरक्षालाई उच्च प्राथमिकतामा राखेर काम गर्न, निरन्तर सम्पर्कमा रहन र सम्बन्धित मुलुकले जारी गरेका सुरक्षा सतर्कतासम्बन्धी अद्यावधिक सूचना नियमितरुपमा प्रवाह गरी नेपालीलाई निरन्तर सुसूचित गर्न निर्देशन दिएकी थिइन् । यो पहल सकारात्मक भए पनि अब निर्देशनमामात्रै सीमित रहनु ठीक हुँदैन । जतिसक्दो चाँडो जोखिम क्षेत्रका नेपाली नागरिकलाई उद्धार गर्न प्रभावकारी कदम चाल्नुपर्छ ।
