ताप्लेजुङस्थित मुक्कुम्लुङ (पाथीभरा) दर्शन गर्न हिँडेका चार जना तीर्थयात्रीले अव्यवस्थित बिजुलीको तारका कारण ज्यानै गुमाए । सोमबार बिहानै मुक्कुम्लुङ दर्शन गर्न हिँडेका उनीहरु मे१च ३०११ नम्बरको बलेरो गाडीमा सवार थिए । तर मुक्कुम्लुङको दर्शन गर्न नपुग्दै फुङ्लिङ नगरपालिका–१० सेवारोचोकको सडकमा झरेको बिजुलीको तारमा अल्झिएर चार जना तीर्थयात्रीको ज्यान गयो ।
मृत्यु हुनेमा ललितपुर महानगरपालिका–१० बस्ने सविना आचार्यकी छोरी १६ वर्षीया आध्या आचार्य, झापा भद्रपुर नगरपालिका–१५ बस्ने ७० वर्षीय विनोद पौडेल, पौडेलकी श्रीमती ६९ वर्षीया सरिता र चालक ताप्लेजुङ फुङलिङ–१० बस्ने अन्दाजी ४२ वर्षीय दुर्गा भट्टराई छन् । दुई जना घाइते छन् ।
सामान्यतया जुनसुकै दुर्घटनामा सम्बन्धित पक्ष एकले अर्कोलाई दोष दिएर पन्छने प्रवृत्ति छ । यो दुर्घटनाको मुख्य दोषी को होला ? पहिलो त यो दुर्घटनाको मूल कारण कमजोर पूर्वाधार हो । विद्युत् प्राधिकरणले पोलहरुमा तार राख्दा बलियो र अडिने खालको तार नराखेकै कारण यस्तो दुर्घटना भएको देखिन्छ । अर्को मुख्य दोषी सडक निर्माण पक्ष । मुक्कुम्लुङ पुग्ने सुकेटार–काफ्लेपाटी सडक स्तरोन्नतिका लागि भन्दै काम थालेको यहाँ धेरै भइसक्यो । कन्टेक प्रालिले पाएको ठेक्काअनुसार २०८० असारमै कालोपत्रे भइसक्नुपर्ने सडक अझै हिलाम्मे छ ।
पानी पर्दा हिलो र घाम लाग्दा धूलो नेपालीले भोग्दै आएको दैनिकी नै हो । सोमबार बिहान पानी पर्दा यहाँका सडक हिलाम्मे बने । यही हिलाम्मे सडक छल्न खोज्दा बोलेरो तार भएकोनेर पुगेको देखिन्छ । तार अल्झिनासाथ बलेरोमा विद्युत् सर्ट भएर चार जनाको ज्यान गएको देखिन्छ । प्राधिकरणको अव्यवस्थित तार प्रणालीका कारण यसरी ज्यान जानेको संख्या बढ्दो छ । विद्युतीकरणका क्रममा राखिएको पोल र तारलाई प्राधिकरणले व्यवस्थापन गर्नुपर्ने हो । हावाहुरीका कारण पोल ढल्ने तार चुँडिने हुँदा पनि प्राधिकरण भने जवाफदेही देखिँदैन ।
यस्तो विषयमा प्राधिकरण आफ्नो कमजोरी लुकाउन पन्छिँदै आएको छ । अर्को विषय प्राधिकरणले यस्ता खतरा भएको ठाउँमा खतराको संकेत राख्ने, सर्वसाधारणलाई पूर्वतयारीको शिक्षाहरु पनि दिनुपर्ने हो । तर आफ्नो कमजोरी लुकाउन सम्बन्धित निकायहरु पन्छिने प्रवृत्ति मौलाउँदो छ । अबका दिनमा यस्ता घटना हुन नदिन बेलैमा पूर्वाधार सुधारौं ।
-1755862759.jpeg)
