नयाँ सरकार गठनपछिको १०० दिनलाई ‘हनिमुन पिरियड’को मानिन्छ, जुन अवधिमा सरकारले गरेका कामलाई महŒवका साथ हेर्ने गरिन्छ । सो अवधिमा गरेको कामले नै सरकारको कार्यशैली प्रस्ट पार्दछ । साँच्चै मुलुकका लागि उपलब्धिमूलक काम गर्ने सरकारले उक्त अवधिमै प्रस्ट संकेत देखाउने गर्छ । सय दिनमा पनि आशा जगाउनेगरी काम गर्न नसके त्यो सरकारबाट थप आशा राख्ने अवस्था नहुने विज्ञहरुको भनाइ छ ।
यहीबीच केपी शर्मा ओली नेतृत्वमा वर्तमान सरकार गठन भएको १०० दिन पूरा भइसकेको छ । माओवादी केन्द्रका अध्यक्ष पुष्पकमल दाहाल नेतृत्वको सरकार ढालेर एमाले–कांग्रेस गठबन्धनको सरकार बनेको हो, जसको नेतृत्व एमाले अध्यक्ष ओलीले गरिरहेका छन् । संघीय संसद्को सबैभन्दा ठूलो दल नेपाली कांग्रेससहित केही साना दलको साथ पाएका ओलीसँग संसद्मा दुईतिहाइभन्दा बढीको बहुमत छ । तर, दुईतिहाइभन्दा बढी बहुमतको यो सरकारले हनिमुन अवधि पार गर्दा आशा जगाउने ठोस काम नै देखाउन सकेको छैन ।
त्यसो त संसद्को पहिलो र दोस्रो ठूलो दलबीचको समीकरण बन्नुलाई नै अस्वाभाविक मानिँदै आएको छ । माओवादीसँगको सत्ता समीकरण बदलेर आफैं प्रधानमन्त्री बनेका ओली आघिल्लो कार्यकालमा जति चर्चामा थिए अहिले त्यो स्थितिमा छैनन् । बरू विभिन्न काण्डहरुले ओलीको साख गिर्दै गइरहेको देखिन्छ । हुन त कांग्रेस–एमालेका नेताहरुले स्थिर सरकारका लागि आफूहरु मिल्नुपर्ने बाध्यता आइपरेको दाबी गर्दै आएका छन् । वर्तमान गठबन्धन गर्नुको मूल उद्देश्य संविधान संशोधन गरी निर्वाचन प्रणाली परिवर्तन गर्ने रहेको बताइन्छ । वर्तमान निर्वाचन प्रणालीले राजनीतिक स्थिरता दिन नसक्ने भन्दै समानुपातिक निर्वाचन प्रणाली हटाउने तयारीमा दुई दल देखिन्छन् ।
तर, माओवादी केन्द्रलगायत प्रतिपक्षी दलहरु यसको विपक्षमा छन् । यद्यपि, सत्ता गठबन्धनसँग दुईतिहाइको बहुमत भएकोले संविधान संशोधन गर्नसक्ने अवस्थामा छ । संविधान संशोधनका लागि दुईतिहाइ बहुमत चाहिन्छ । तर, समानुपातिक निर्वाचन प्रणाली हटाउँदा जनस्तरबाटसमेत विरोधको सामना गर्नुपर्ने देखिन्छ । किनभने, समानुपातिक प्रणालीकै कारण अहिले हरेक जाति, समुदाय, वर्ग र क्षेत्रबाट संसद्मा प्रतिनिधित्व भएको छ ।
वर्तमान सरकारको कमजोरी गत असोज १० देखि १२ गतेसम्म आएको अविरण वर्षाले सिर्जना गरेको विपत्तिको समयमा छरपस्ट देखियो । बाढी, पहिरो तथा डुबानमा परेकाको उद्धारमा सरकार पूर्ण असफल बन्न पुग्यो । वर्षाको पूर्वानुमान भएकै सन्दर्भमा पनि पूर्वतयारी गर्नबाट सरकार चुक्यो । यसले सरकार पूरै आलोचित बन्न पुग्यो । त्यसबाहेक पनि अन्य खास कुनै काम देखिएको छैन, जसले जनतामा आशा जगाएको होस् । प्रधानमन्त्री ओली मुलुक र जनताको हितमा भन्दा पनि आफ्नो सत्ता टिकाउने ध्याउन्नमै छन् । यद्यपि, पछिल्लो समय सत्ता गठबन्धनमै खटपट सुरु भइसकेकोले वर्तमान सरकारको आयुसमेत ‘आज कि भोलि’को अवस्थामा पुगेको छ । यसले जनतामा पुनः निराशाबाहेक केही नदिने निश्चित छ ।
