संकट होस् या समृद्धि, यो दुई पाटा हेर्न सरकार प्रमुखहरु, देशको शासनपद्धति हेरे पुग्छ । यसपटकको वर्षा र बाढीपहिरोमा सरकार प्रमुखहरुले हदैसम्मको गैरजिम्मेवारीपन देखाएका छन् । कतिसम्म भने बाढीपहिरोमा परी २०० भन्दा बढीले ज्यान गुमाइसकेपछि अमेरिकाबाट काठमाडौं उत्रिएका प्रधानमन्त्री केपी शर्मा ओलीले ‘फोरकास्ट गरेको थियो ‘रेड अलर्ट’ भनेर तर कहाँकहाँ पहिरो जान्छ त भनेको थिएन ,.गएपछि थाहा हुने कुरा भयो । काठमाडौंमा यति डुबान हुनेगरी आउ“छ भनेर कल्पना गरिएको थिएन’ भन्दै रिस पोख्ने काम गरे ।
बाढीपहिरोमा परी काठमाडौं उपत्यकामै ५६ जनाले ज्यान गुमाए भने कयौं घाइते भए । आफू अमेरिका सयरमा निस्कँदा प्रधानमन्त्री ओलीले उपप्रधान तथा सहरी विकासमन्त्री प्रकाशमान सिंहलाई कार्यवाहक सरकार प्रमुख बनाएर राखेका थिए । कार्यवाहकको त झन् कुरै गरिसाध्य छैन । बाढीपहिरोले काठमाडौं उपत्यका डुबानमा परेकै दिन सिंह बबरमहलसमा दाँवाली मिलन क्लबको माला र सम्मान थापेर बसिरहेका थिए । यतिमात्र हैन कार्यवाहक सिंह आइतबार युरोपियन युनियनको सम्मान थाप्न पोखरा पुगेका थिए ।
जल तथा मौसम विज्ञान विभागले वर्षाको उच्च जोखिम भनी पूर्वानुमान गर्दा राष्ट्रपति रामचन्द्र पौडेलले पनि टेरेनन् । पौडेल कार्यवाहक प्रधानमन्त्री सिंहसहितको टोली लिएर बिहीबार नवलपरासीमा बनेको सुस्ता पुल उद्घाटन गर्न पुगे । जबकि, सोही दिनबाट वर्षा सुरू हुने भन्दै उक्त जिल्लालाई पनि विभागले उच्च जोखिमको सूचीमा राखेको थियो ।यो विपद्मा गृहमन्त्री रमेश लेखक र रक्षामन्त्री मानवीर राईको पनि कुनै तदारुकता देखिएन । राजनीतिक दलका शीर्ष नेताहरु एकले अर्कालाई आरोप लगाएरै समय कटाउन व्यस्त देखिए । ती दलका युवा शक्ति र विद्यार्थी शक्ति कुन दुलामा लुके अत्तोपत्तो पाइएन ।
यो त भयो राजनीतिक नियुक्तिबाट बनेका सरकार प्रमुखहरुको अटेरीपन । स्थायी सरकारका रुपमा हेरिने प्रशासन हाँक्दै बसेका मुख्यसचिव एकनारायण अर्यालसमेत यो दौडमा पछि परेनन् । उनी त अझ आफ्नो गृहजिल्ला स्याङ्जा पुगेर धुमधडकासहितको सम्मान थापेर आइपुगे आइतबार । कतिसम्म भने आइतबार मृतक र घाइतेको संख्या थपिँदो थियो । देश शोकमा परेको बेला अर्यालले पञ्चेबाजासहित फूलमालामा सजिएर आँधीखोला गाउँपालिकालगायत स्थानमा छाता ओडेरै सम्मान लिएका थिए । देशको अवस्था कस्तो छ, देश किन यस्तो बन्दै छ भनेर अरू कतै हेर्न परेन । यी नै गैरजिम्मेवार प्रमुखहरुलाई हेरे पुग्छ ।
