काठमाडौं- न्युजिल्याण्डस्थित नेपाली अवैतनिक वाणिज्य दूतावासले ठगीको घटना बढेको भन्दै सतर्क रहन आग्रह गरेको छ । पछिल्लो समय नेपालीहरुलाई रोजगारीका लागि भन्दै भिजिट भिसामा न्युजिल्याण्ड पुर्याएर ठग्ने क्रम बढेकोप्रति दूतावासले सचेत गराएको हो ।
दूतावासले एक सूचना जारी गर्दै नेपालबाट भिजिट भिसामा न्युजिल्याण्ड रोजगारीमा पठाइदिने भन्दै एजेन्टहरुले लाखौं रुपैयाँ असुल्ने गरेको पाइएको उल्लेख गरेको छ । म्यानपावर कम्पनी र एजेन्टहरुले रोजगारीको प्रलोभन देखाई चर्को शुल्क लिएर भिजिट भिसामा न्युजिल्याण्ड पुर्याउने गरेको गुनासो आउन थालेको वाणिज्य दूतावासले जनाएको छ ।
भिजिट भिसामा न्युजिल्याण्ड पुगेकाहरुले भनेजस्तो रोजगारी नपाएको र ठगीमा परेको भन्दै दूतावासमा सम्पर्क गरिरहेको सूचनामा उल्लेख गरिएको छ ।भिजिट भिसामा न्युजिल्याण्ड जानेहरुले रोजगारीको अवसरमात्र नभएर अनुमतिसमेत नपाउने हुँदा ठगिने सम्भावना धेरै भएकाले बुझेरमात्रै अघि बढ्न दूतावासले सचेत गराएको छ ।
‘कोही कसैले न्युजिल्याण्डमा भिजिट भिसामा पु¥याइ काम लगाइदिन्छु भनेमा उनीहरूको कुरामा विश्वास नगर्न र बेलैमा सचेत हुन अनुरोध छ,’ दूतावासले भनेको छ । भिजिट भिसाले कुनै पनि देशमा काम गर्ने अनुमति नदिने र पर्यटकको रुपमामात्रै भ्रमण गर्न पाइने भएकाले रोजगारीको कुनै पनि प्रलोभनमा नपर्न आग्रह गरिएको छ ।
यस्तै न्युजिल्याण्डमा राम्रो आम्दानी हुने र मौसमी कामदारको माग रहेको भन्दै एजेन्टहरुले ठगी गर्ने क्रम बढेपछि वैदेशिक रोजगार विभागमासमेत उजुरी पर्न थालेको छ । वैदेशिक रोजगारीका लागि मौसमी कामदारको रुपमा विदेश जान कानुनतः श्रम स्वीकृति लिनुपर्ने व्यवस्था नभएका कारण एजेन्टहरुलाई ठगी गर्न सजिलो भएको बताइन्छ ।
सोही कारण व्यक्तिगत ठगीका घटनाहरु बढ्दै गएको विभागका निर्देशक एवं सूचना अधिकारी गुरुदत्त सुवेदीले बताए ।वैदेशिक रोजगारीमा जान संस्थागत र व्यक्तिगत श्रम स्वीकृति लिनुपर्ने भए पनि सरकारले छोटो अवधिका लागि श्रम स्वीकृति दिने गरेको छैन ।
