काठमाडौं– वैदेशिक रोजगार बोर्ड सचिवालयले विदेशमा रोजगारीका लागि जाने महिलाको सीप तथा दक्षता बढाउने उद्देश्यले निःशुल्क आवासीय तालिम सञ्चालन गर्ने भएको छ । बोर्डले वैदेशिक रोजगारीका लागि विदेश जाने तयारीमा रहेका महिलालाई सिलाइकटाइसम्बन्धी निःशुल्क आवासीय तालिम सञ्चालन गर्ने भएको हो ।
विदेश जान चाहने महिलाहरुको सीप दक्षता अभिवृद्धि गर्न सिलाइ कटाइसम्बन्धी निःशुल्क तालिम प्रदान गर्न लागिएको बोर्डका निर्देशक एवं सूचना अधिकारी राजन पौडेलले जानकारी दिए । उनका अनुसार सीप सिक्न चाहने देशैभरिका महिलालाई खाने, बस्ने सुविधासहित राजधानीमा नै ३० दिने निःशुल्क आवासीय तालिम सञ्चालन गरिनेछ ।
निःशुल्क आवासीय तालिम सञ्चालनका लागि बोर्डले टेन्डर आह्वान गरी तालिमप्रदायक संस्था छनोट कार्य अघि बढाएको छ । बोर्डले तोकेको बजेटको अधिनमा रही छनोटमा परेका संस्थाहरुले छिट्टै तालिम सञ्चालन गर्ने पौडेलले बताए । ‘हामीले सकभर धेरै महिलालाई तालिममा सहभागी गराउन सकियोस् भन्ने उद्देश्यले निःशुल्क आवासीय सीप तालिम सञ्चालन गर्न लागेका हौं,’ उनले भने, ‘बजेटअनुसार तालिम दिने संस्थाहरुले कति संख्या समेट्न सक्छन् भन्ने निक्र्योल हुन बाँकी नै छ ।’
सबैलाई पायक पर्ने र केन्द्रबिन्दु भएकाले काठमाडौंमा नै तालिम सञ्चालन हुने उनले बताए । नेपालमा सिकेको जानेको सिलाइबुनाइ र कटिङले विदेशमा काम नगर्ने हुँदा सोहीअनुरुपको तालिम सञ्चालन गरी महिलाहरुलाई दक्ष बनाउने लक्ष्यका साथ उक्त योजना ल्याइएको पौडेलको भनाइ छ ।
तालिममा सहभागी हुन चाहने महिलाको उमेर समूह १८ देखि ३५ वर्ष र न्यूनतम कक्षा ८ उत्तीर्ण गरेको हुनुपर्ने बताइएको छ । हाल जोर्डनलगायतका देशमा गार्मेन्टमा सिलाइ कटाइसम्बन्धी रोजगारीको अवसर प्रशस्तै रहेको बोर्डले जनाएको छ । तालिम लिन चाहने महिलाहरुले बोर्डको सचिवालय वा आफ्नो जिल्लामा रहेका आप्रवासी स्रोत केन्द्रमा सम्पर्क गर्न सक्ने छन् ।
सुरक्षित आप्रवासन कार्यक्रम (सामी) अन्तर्गत देशका ३९ जिल्लामा आप्रवासी स्रोत केन्द्र तथा उपकेन्द्रहरू सञ्चालनमा रहेको बोर्डले जनाएको छ । सामीले पनि विभिन्न जिल्लामा निःशुल्क आवासीय सीप तालिम कार्यक्रम सञ्चालन गर्दै आइरहेको उल्लेख गर्दै निर्देशक पौडेलले अन्य प्रकारका तालिम प्रदान गर्न आवश्यक गृहकार्य भइरहेको बताए ।
प्रकाशित मिति: बुधबार, जेठ १०, २०८० १३:११
-1752335779.jpg)
