काठमाडौं - संयुक्त अरब इमिरेट्स (युएई)स्थित नेपाली दूतावासले वैशाख महिनाको कार्यसम्पादन विवरण सार्वजनिक गरेको छ । दूतावासले २०८० को सुरुआती महिनामा सम्पादन भएका प्रमुख सेवाहरुको तथ्यांकीय विवरण सार्वजनिक गरेको हो ।
नेपाली कामदारहरुको प्रमुख श्रम गन्तव्यहरुमध्ये एक युएईमा रहेको नेपाली दूतावासले प्रत्येक महिना आफूले गरेका प्रमुख कार्यसम्पादनहरुको विवरण सार्वजनिक गर्दै आइरहेको छ । दूतावासले युएईमा रहेका नेपालीहरुको समस्या समाधान तथा सहजीकरणमा गरेको कार्यसम्पादन तथा प्रगति विवरणमा वैशाख महिनामा दुई हजार ५४० पासपोर्ट नवीकरणका लागि संकलन भएको जनाएको छ ।
त्यस्तै दुई हजार ६१६ वटा पासपोर्ट नवीकरणपश्चात् वितरण गरिएको विवरणमा उल्लेख छ ।यसैगरी ४६ जनालाई भिसा प्रदान गरिएको छ । यसअघि चैत्र महिनामा ६९ जनालाई भिसा प्रदान गरिएको दूतावासले जनाएको छ । यस्तै १०७ जनाको ट्राभल डकुमेन्ट बनाइएको छ भने १३१ जनाको कागजात प्रामाणिकरण गरिएको छ । साथै, ४०६ वटा व्यक्तिगत भिसा प्रमाणीकरण भएको छ ।
यस्तै संस्थागतरुपमा आएको ९२ वटा मागपत्र प्रमाणीकरण भएको छ भने १०८ वटा समूहगत भिसा प्रमाणीकरण भएको दूतावासले उल्लेख गरेको छ । नयाँ वर्षको पहिलो महिनामा विभिन्न कारणले युएईमा मृत्यु भएका नेपालीहरुको १४ वटा शव व्यवस्थापन भएको उल्लेख गरिएको छ ।
यस्तै विभिन्न माध्यमबाट आएका ५१९ वटा गुनासा तथा उजुरीहरुको सम्बोधन गरिएको छ । कामदारहरुलाई क्षतिपूर्ति र इन्स्योरेन्सबापत वैशाख महिनामा दुई लाख ४० हजार १२३ एइडी अर्थात् झण्डै ८६ लाख रुपैयाँ खर्च भएको दूतावासले विवरणमा समेटेको छ ।
