दोहा- साउदीमा हत्या अभियोग लागेका पाँच नेपाली निर्दोष साबित भइ नेपाल फर्किएका छन्।
रोजगारीमा साउदी पुगेका पाँच नेपालीहरु मिलेर एक जना भारतीय नागरिकको हत्या अभियोग जेल परेर जेलमुक्त भएपछि नेपाल फर्किएका हुन्। ।
साउदी अदालतले उनीहरु पाँच जनालाई निर्दोष साबित गरेपछि ३ वर्ष ९ महिना जेलजीवन बिताएपछि रिहा भएका हुन् ।
जेलबाट रिहा भए पनि नेपाल फर्किन सहज भएन, रिहा भएको ८ महिना पछि मात्र रियादस्थित नेपाली दूतावासले सहजीकरण गरेपछि सबै जना स्वदेश फर्किन सफल भएको सामाजिक अभियन्ता सरोज रायले जानकारी दिए।
जेल मुक्त भएर नेपाल फर्किनेहरुमा भक्तपुर चागुंनारायण न.पा. वडा नं. ३ का कृष्ण बहादुर गाँसी, महोत्तरी लोहारपट्टी न.पा. वडा नं.५ का ईन्द्रजीत मण्डल , इलामको इलाम न.पा. वडा नं. ३ का धनबहादुर तामाङ्ग, धनुषा कमला न.पा. वडा नं. ५ का राम प्रसाद ठाकुर र सिरहाको सिरहा न.पा. वडा नं. १२ का वासुदेव ठाकुर रहेका छन् ।
जेलबाट रिहा भएपछि दमामस्थित नेपाली दूतावासको सेन्टरमा सबै जना बसे ।उक्त बसाइको क्रममा दूतावासका कर्मचारी मार्पत उनीहरुले जानकारी पाए कि साउदीको जेलमा परेको व्यक्ति निर्दोश साबित भएमा साउदीको सरकारले त्यस्तो निर्दोश व्यक्तिलाई क्षतिपूर्ति दिने व्यवस्था गरेको छ ।
त्यहीँ आश्वासनमा परी सबै जना ८ महिना सेन्टरमा बसेर एक्जिट भिसा लागेपछि क्षतिपूर्ति बिना नै स्वदेश फर्किएको अभियन्ता रायले बताए ।
उनीहरु मध्ये वासुदेव ठाकुरको सो कम्पनीमा काम गरेको तलब दुई हजार साउदी रियाल साउदीको बैंकमा रहेको, राम प्रसाद ठाकुरको तलब १,५०० साउदी रियाल साउदीको बैंकमा रहेका र सो कम्पनीबाट पाउनु पर्ने अन्य सेवा सुविधा र २ महिनाको काम गरेको तलब समेत बाँकी रहेको पिडित बताएका छन् ।
उनीहरु नेपाल फर्की सकेको अवस्थामा कार्यरत कम्पनिबाट पाउनु पर्ने तलब सुविधा लगायत सो गन्तव्य मुलुकबाट निर्दोश भएर पनि जेल परेको क्षतिपूर्ति पाउन आशमा अहिले पनि बसेका छन् । पक्राउ परेका बेला देखि म उनीहरुको उद्धारको लागि निरन्तर पहल गर्दै आएको छु, अभियन्ता रायले भने,वैदेशिक रोजगार बोर्डमा उनीहरुको लागि पहिलो पटक निवेदन दिएको थिए, सम्बन्धित निकाय र दूतावासको ध्यानाकर्षण गराएको थिए ।'
अहिले पनि उनीहरुलाई सरोकारवाला निकायमा लगेर क्षतिपूर्तिको लागि पहल गरिरहेको उनले बताए ।हामी जस्तो समाजिक अभियन्ताले गर्ने नै यति हो- ध्यानाकर्षण गराउने, पिडीतलाई बाटो देखाउने, सम्बन्धित निकायलाई दबाव दिने आदि संस्थागत रूपमा कार्य गर्ने नेपालमा सम्बन्धिच निकाय र विदेशमा दूतावास नै हो, उनले भने । उनीहरु पाँचै जनाले न्याय कसरी र कहिले पाउने हो?
