काठमाडौं - साउदी अरेबियाको रियादस्थित नेपाली दूतावासले पुनः श्रम स्वीकृतिको सेवा दिन सुरु गरेको छ । नेपाली दूतावास रियाद र महावाणिज्यदूतावास जेद्दाले रोजगारीका लागि साउदीमा रहेका नेपाली श्रमिकहरुलाई संयुक्तरुपमा पुनः श्रम स्वीकृति दिन सुरु गरेको हो ।
दूतावासले आइतबार एक विज्ञप्ति जारी गर्दै नेपाल सरकारको निर्णयअनुसार पुनः श्रम स्वीकृति सेवा प्रवाह गर्न थालिएको जनाएको छ । यसअघि कतार र मलेसियास्थित नेपाली दूतावासले पुनः श्रम स्वीकृति दिन सुरु गरिसकेको छ ।सरकारले विदेशमा रहेका श्रमिकहरुको सुरक्षा र सहजताको लागि भन्दै गन्तव्य मुलुकबाटै पुनः श्रम स्वीकृति दिने निर्णय गरेको थियो ।
दूतावासले श्रम स्वीकृति सकिएका वा पुनः श्रम स्वीकृति लिनुपर्ने श्रमिकहरुलाई अनलाइनमार्फत आवेदन दिन आग्रह गरेको छ । अनलाइन आवेदन दिनका लागि सरकारले बनाएको अनलाइन सफ्टवेयर वैदेशिक रोजगार व्यवस्थापन (फेइम्स्) प्रणालीमा आबद्ध हुनुपर्ने दूतावासले जनाएको छ ।
आवेदन दिँदा राहदानीको फोटो, इकामाको फोटो, रि–इन्ट्री भिसा (छुट्टीको कागजात) भएकाले सो भिसाको प्रतिलिपि, विदा समाप्त हुने अवधि खुलेको कागजात, रि–इन्ट्री भिसा नभएकाले इकामाको म्याद खुलेको निस्सा वा एब्सोरबाट इकामाको म्याद देखिने स्क्रिनसट गरिएको फोटो अपलोड गर्नुपर्नेछ ।
साथै, सवारी चालकहरुको हकमा साउदीबाट जारी भएको सवारीचालक अनुमतिपत्रको निस्सा अपलोड गर्नुपर्नेछ । त्यस्तै यस अगाडि श्रम स्वीकृति लिँदा र हाल कार्यरत रहेको कम्पनी फरक भएमा हाल कार्यरत कम्पनीसँग गरिएको करार सम्झौतापत्र पनि अपलोड गर्नुपर्ने दूतावासले उल्लेख गरेको छ ।
यसैगरी घरेलु कामदारको रुपमा रहेका व्यक्तिले उल्लिखित कागजातबाहेक कफिलको परिचयपत्र अर्थात् कफिलको आइडी, आफूले पाएको तलब, भत्तालगायतका अन्य सेवा सुविधा खुलेको करार सम्झौता तथा स्वघोषणा फाराम भरेर बुझाउनुपर्नेछ । पुनः श्रम स्वीकृति लिनका लागि श्रमिकले कल्याणकारी कोष, जीवन बिमा र सामाजिक सुरक्षा कोषमा अनिवार्य तोकिएको रकम बुझाएको हुनु पर्ने दूतावासद्वारा जारी सूचनामा उल्लेख छ ।
