काठमाडौं - सरकारले आगामी आर्थिक वर्षमा वैदेशिक रोजगारीमा जाने युवाहरुका लागि सीप अभिवृद्धि कार्यक्रम सञ्चालन गर्ने भएको छ । अर्थमन्त्री डा. प्रकाशशरण महतले आइतबार संघीय संसद्मा विनियोजन विधेयक–२०८० का सिद्धान्त र प्राथमिकता प्रस्तुत गर्दै उक्त जानकारी दिएका हुन् ।
उनले रोजगारीका लागि विदेश जाने नेपाली युवाहरुलाई दक्ष तथा सीपयुक्त बनाउन आवश्यक कार्यक्रम सञ्चालन गर्ने बताए ।वैदेशिक रोजगारीलाई सुरक्षित, मर्यादित र व्यवस्थित बनाउन सरकारले प्राथमिकता दिने उनको भनाइ छ । वैदेशिक रोजगारीमार्फत हुने विप्रेषण (रेमिट्यान्स)लाई सहज र औपचारिक माध्यमबाट मुलुकमा भित्र्याउन सहुलियत दिने विषयलाई प्राथमिकतामा राखिएको उनले जानकारी दिए ।
‘रेमिट्यान्सलाई औपचारिक माध्यमबाट भित्र्याउन सरकारले प्रोत्साहन गर्नेछ,’ उनले भने, ‘संकटपूर्ण अवस्थामा पनि विप्रेषणकै कारण आर्थिक गतिविधि चलायमान हुन मद्दत पुग्यो ।’अर्थमन्त्री महतले वैदेशिक रोजगारीमात्र नभई निजी क्षेत्रको संलग्नतामा जनशक्तिको सीप विकास गरी स्वदेशमा नै रोजगारीको अवसर सिर्जना गर्ने बताए । उनले स्वदेशमा औद्योगिक श्रम सम्बन्धलाई व्यवस्थित गर्दै कार्यस्थलमा नै प्रशिक्षण प्रदान गरी थप रोजगारीको सिर्जना गरिने जानकारी दिए ।
