काठमाडौं - वैदेशिक रोजगार बोर्ड सचिवालयले रोजगारीका लागि विदेश गएका नेपालीहरुलाई स्वास्थ्य परामर्श दिन उच्च महत्वकासाथ सञ्चालनमा ल्याएको टेलिमेडिसिन सेवा प्रभावकारी बन्दै गएको जनाएको छ ।
बोर्ड सचिवालयले वैदेशिक रोजगारीमा रहेका २५० जनाभन्दा बढी नेपालीले आफ्नो स्वास्थ्य समस्या समाधानका लागि टेलिमेडिसिन सेवा लिँदै उत्साहजनक सहभागिता जनाएको उल्लेख गरेको छ ।
‘टेलिमेडिसिन सेवा सुरु गरेयता २५० भन्दा बढी नेपाली श्रमिकले स्वास्थ्य परामर्श लिएको रेकर्ड छ,’ बोर्डका कार्यकारी अधिकृत डा. द्वारिका उप्रेतीले भने, ‘यो सेवा सञ्चालन चुनौतीपूर्ण भए पनि अहिलेसम्म स्वास्थ्य परामर्श लिनेको संख्यालाई हेर्दा प्रभावकारी नै मान्नुपर्छ ।’
बोर्डले यही चैत १५ गतेदेखि विदेशमा रहेका नेपालीलाई स्वास्थ्य परामर्श प्रदान गर्ने उद्देश्यले वीर अस्पतालसँगको सहकार्यमा टेलिमेडिसिन सेवा सञ्चालनमा ल्याएको बताउँदै उनले सेवा लिने अधिकांशले मेडिकल अधिकृतसँग पेट तथा ढाडसम्बन्धी समस्या राख्ने गरेको बताए ।
‘अस्पतालले दिएको जानकारीअनुसार एक महिनाको अवधिमा सेवा लिनेमध्ये सबैभन्दा बढी पेटसम्बन्धी समस्या रहेको मैले थाहा पाएको छु,’ उनले भने, ‘ढाडको समस्या भएका बिरामी पनि थुप्रै छन्, यीबाहेक अन्य विभिन्न खाले रोगका बारे पनि सेवाग्राहीले परामर्श लिइरहेको अस्पतालले जानकारी दिएको छ ।’
स्वास्थ्य समस्या भएर फोन गर्नेहरुमा समयमा खाना नखाने र ‘फुड पोइजन’का कारण पेटसम्बन्धी समस्या देखिएको र लामो समयसम्म उभिएर काम गर्नेहरुमा ढाडको समस्या भएको पाइएको बोर्डका निर्देशक एवं सूचना अधिकारी राजन पौडेलले बताए ।
अस्पतालले दिएको विवरणअनुसार स्वास्थ्य परामर्श तथा उपचारका लागि श्वासप्रश्वास, छाला, सुगर, प्रेसरलगायतका विभिन्न समस्याबाट पीडित बिरामीको फोन गर्ने संख्या पनि ठूलै रहेको पौडेलले जानकारी दिए । उनका अनुसार कतिपयमा मानसिक समस्यासमेत देखिएको भन्दै उनीहरुलाई मनोचिकित्सक परामर्श पनि उपलब्ध गराउने काम भइरहेको छ ।
मानसिक समस्या हुनेमा काम गर्न गाह्रो भएर घर फर्किन चाहने, निद्रा नलाग्ने, खाना खान मन नलाग्ने, राति बरबराउने, काम गर्न मन नलाग्ने लक्षणहरु देखिएको बताइएको छ । यस्तै स्वास्थ्यसम्बन्धी गम्भीर समस्या देखिएका झण्डै २५ जनालाई विशेषज्ञ सेवा दिइसकेको बोर्डले जनाएको छ ।
तुलनात्मक रुपमा आगामी दिनमा स्वास्थ्य परामर्श तथा विशेषज्ञ सेवा लिने कामदारको संख्या अझै बढ्ने बोर्डले उल्लेख गरेको छ । टेलिमेडिसिन सेवा लिनेमा सबैभन्दा बढी संयुक्त अरब इमिरेट्स (युएई), साउदी अरेबिया, कतार र मलेसियामा रहेका नेपालीहरु रहेको बोर्डले जनाएको छ ।
गत चैत १५ गतेबाट सुरु भएको टेलिमेडिसिन सेवाका लागि स्वास्थ्य समस्या भएका नेपालीहरुले सार्वजनिक बिदाको दिनबाहेक नेपाली समयानुसार बिहान १० देखि बेलुका ५ बजेसम्म सम्पर्क गर्न सकिने छ । सामान्य अवस्थामा मेडिकल अधिकृतले फोनमार्फत नै स्वास्थ्य समस्या र जिज्ञासा हल गर्ने प्रयास गर्ने छन् भने जटिल स्वास्थ्य समस्या भएका बिरामीलाई प्रत्येक हप्ता आइतबार र शुक्रबार विशेषज्ञ डक्टरहरुबाट विशेषज्ञ सेवा दिने बोर्डले जनाएको छ ।
प्रकाशित मिति: शुक्रबार, वैशाख २२, २०८० ०९:३२
-1745656903.jpeg)