काठमाडौं - मलेसियास्थित नेपाली दूतावासले रोजगारीका लागि मलेसियामा रहेका नेपालीहरुलाई पुनः श्रम स्वीकृतिको सेवा प्रदान गर्न थालेको छ ।
दूतावासले नेपाल सरकारको निर्णयअनुसार यही वैशाख १५ देखि उक्त सेवा प्रदान गर्न थालेको हो । यसअघि कतारस्थित नेपाली दूतावासले पुनः श्रम स्वीकृति दिन सुरु गरिसकेको छ ।
सरकारले विदेशमा रहेका श्रमिकहरुलाई गन्तव्य मुलुकबाटै पुनः श्रम स्वीकृति दिने निर्णय गरेको थियो । यसरी दूतावासबाटै पुनः श्रम स्वीकृति दिने भएपछि दूतावासले संख्याको आधारमा अनलाइन टोकनको प्रबन्ध गरेको छ ।
यसका लागि श्रमिकले दूतावासमा उपस्थित हुनु नपर्ने भन्दै अनलाइनबाटै आवेदन दिन आग्रह गरेको छ । आवेदन दिँदा राहदानी, मलेसियाको आइडी कार्ड, करार सम्झौतापत्र, पुरानो श्रम स्वीकृति, मलेसिया गएको मिति प्रस्ट देखिने कागजात अपलोड गर्नुपर्ने दूतावासले उल्लेख गरेको छ ।
अनलाइन आवेदन दिनका लागि सरकारले बनाएको अनलाइन सफ्टवेयर वैदेशिक रोजगार व्यवस्थापन (फेइम्स्) प्रणालीमा आबद्ध हुनुपर्ने दूतावासले जनाएको छ । अनलाइनबाट सबै प्रक्रिया पूरा भएपछि अन्तिममा श्रम स्वीकृति दिने ठाउँमा मलेसिया भनेर छनोट गर्न सुझाइएको छ ।
पुनः श्रम स्वीकृतिका लागि श्रमिकले कल्याणकारी कोष, जीवन बिमा र सामाजिक सुरक्षा कोषमा अनिवार्य तोकिएको रकम बुझाएको हुनुपर्नेछ ।
प्रकाशित मिति: बुधबार, वैशाख २०, २०८० १३:२६
-1745656903.jpeg)