काठमाडौं - वैदेशिक रोजगारीका लागि कम्बोडिया पठाइदिन्छु भन्दै ठगी गरेको आरोपमा एक जना पक्राउ परेका छन् । चितवनको राप्ती नगरपालिका–९ घर भई हाल भक्तपुर जगाती बस्ने ३१ वर्षीय राजु श्रेष्ठलाई प्रहरीले पक्राउ गरेको हो ।
श्रेष्ठले वैदेशिक रोजगारीका लागि कम्बोडिया आरएफसी सेक्युरिटी गार्डमा मासिक एक लाख रुपैयाँभन्दा बढी तलब हुने काम लगाइदिन्छु भनी प्रलोभनमा पारी बिजु कार्कीसँग पटक–पटक गरी सात लाख रुपैयाँ लिई ठगी गरेको प्रहरीले जनाएको छ ।
कार्कीले आफू ठगीमा परेको भन्दै वैदेशिक रोजगार विभागमा दिएको उजुरीका आधारमा काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरी टोलीले लाजिम्पाटबाट पक्राउ गरेको जनाइएको छ ।
पीडितबाट पटकपटक गरी रकम लिएर सम्पर्कविहीन भएको उजुरीका आधारमा वैदेशिक रोजगार विभागले उनलाई पक्राउ गरी उपस्थित गराइदिन प्रहरीलाई पत्राचार गरेको थियो ।
पक्राउ परेका श्रेष्ठलाई थप अनुसन्धान तथा कारबाहीका लागि विभागमा बुझाइएको प्रहरी उपरिक्षक सोमेन्द्र सिंह राठौरले जानकारी दिए । नयाँ वर्ष २०८० सँगै वैदेशिक रोजगारीका नाममा ठगी गरेको भन्दै उजुरी गर्नेको संख्या बढेको विभागले जनाएको छ ।
