काठमाडौं– युएईस्थित नेपाली दूतावासले रोजगारीका लागि फुजैराह इमिरेट्समा रहेका नेपालीहरुसँग ‘श्रमिक संवाद’ एवं अन्तरक्रिया कार्यक्रम सञ्चालन गरेको छ । वैदेशिक रोजगारीका लागि फुजैराहमा रहेका नेपालीहरुले भोग्नुपरेका समस्या, गुनासा र सेवा प्रवाहको प्रभावकारिताबारे अन्तक्र्रिया गर्न दूतावासले श्रमिक संवाद कार्यक्रम सञ्चालन गरेको जनाएको छ ।
दूतावासका कार्यवाहक राजदूत विशाल भट्टराईले श्रमिकसँग संवाद कार्यक्रम आयोजना गर्नुको उद्देश्य नेपाली कामदारहरुको समस्या तथा गुनासाहरु प्रत्यक्षरुपमा अवगत हुने र समस्या समाधानमा सघाउ पु¥याउने रहेको बताए । उनले यस्ता कार्यक्रम नियमितरुपमा आयोजना गर्ने र भविष्यमा घुम्ती सेवासमेत सञ्चालन गरिने जानकारी दिए । भट्टराईले नेपाली दूतावासको सेवा प्रवाहसम्बन्धी गरिएको प्राविधिक तथा नीतिगत सुधारबारे पनि जानकारी गराए ।
कार्यक्रममा वैदेशिक रोजगारीका क्षेत्रमा नेपाल सरकारले हालै सञ्चालनमा ल्याएको श्रम स्वीकृति, टेलिमेडिसिन सेवा तथा सामाजिक सुरक्षा योजनालगायतका कार्यक्रमबारे दूतावासले जानकारी दिएको छ । त्यस्तै फुजैराहमा कार्यरत नेपालीहरूले दैनिक रूपमा भोग्नुपरेका समस्या, गुनासा, दूतावासको सेवा प्रवाहका सन्दर्भमा उठेका जिज्ञासा एवं सुधारका उपायहरू प्रत्यक्षरूपमा सुन्ने, तत्काल समाधान गर्न सकिने समस्याहरूलाई सम्बोधन गर्नेलगायतका विषयमा पनि छलफल भएको बताइएको छ ।
कार्यक्रममा दूतावासका श्रम (काउन्सेलर) दीनबन्धु सुवेदीले नेपाल सरकारले वैदेशिक रोजगारीका क्षेत्रमा हाल लागू गरेका सुधारका विषयहरू समेटेर जानकारीमूलक सामग्री प्रस्तुत गरेका थिए ।सरकारले वैदेशिक रोजगारीमा रहेका नेपालीहरुको समस्या समाधनका लागि पहल गर्न गन्तव्य मुलुकमा रहेका नेपाली नियोगमा श्रम तथा श्रम सहचारी नियुक्त गरी ‘श्रम डेस्क’ सञ्चालनमा ल्याएको सुवेदीले जानकारी दिए । दूतावासबाट कार्यवाहक राजदूत भट्टराई, श्रम काउन्सेलर सुवेदीलगायत अन्य कर्मचारीहरूको सहभागिता रहेको उक्त कार्यक्रममा फुजैराहमा कार्यरत १०० जनाभन्दा बढी नेपाली श्रमिकको उपस्थिति रहेको थियो ।
