काठमाडौं - श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने श्रमिकको स्वास्थ्य परीक्षणसम्बन्धी कार्य गर्ने २१५ वटा स्वास्थ्य संस्थाको सूची सार्वजनिक गरेको छ । वैदेशिक रोजगारीमा जानुपूर्व श्रमिकहरुको स्वास्थ्य परीक्षण गर्न इजाजतपत्र प्राप्त गरेका स्वास्थ्य संस्थाहरुको नवीकरणका आधारमा मन्त्रालयले उक्त सूची सार्वजनिक गरेको हो ।
स्वास्थ्य परीक्षणका लागि अनुमति लिएका संस्थाहरुले ‘स्वास्थ्य संस्था सूचीकरण, नवीकरण तथा अनुगमनसम्बन्धी कार्यविधि, २०७२’ अनुसार प्रत्येक आर्थिक वर्षको पुस मसान्तभित्र नवीकरण गर्नुपर्ने व्यवस्था छ । निर्धारित समयभित्र तोकिएबमोजिम दस्तुर, कागजात तथा अन्य विवरणहरु पेस गरी नवीकरणका लागि योग्य भएका स्वास्थ्य संस्थाहरुको सूची प्रकाशन गरिएको मन्त्रालयले जनाएको छ ।
सूचीमा परेका स्वास्थ्य संस्थाहरुले २०८० पुस मसान्तसम्म विदेश जाने श्रमिकहरुको स्वास्थ्य परीक्षण गर्न पाउने छन् ।यसरी स्वस्थ्य परीक्षणसम्बन्धी कार्यका लागि नवीकरण गर्नेमा सबैभन्दा बढी उपत्यकामा रहेका स्वास्थ्य संस्था छन् । उपत्यकाबाट १७४ वटा स्वास्थ्य संस्था नवीकरणको सूचीमा परेको मन्त्रालयले प्रकाशन गरेको विवरणमा देखिन्छ । यसबाहेक सुनसरी, झापा, चितवन, नेपालगञ्ज, धनुषा, दाङमा रहेका स्वास्थ्य संस्था नवीकरणको सूचीमा परेका छन् ।
वैदेशिक रोजगार ऐन तथा वैदेशिक रोजगार नियमावली, २०६४ बमोजिम वैदेशिक रोजगारीमा जाने श्रमिकले सरकारले तोकेका स्वास्थ्य संस्थाबाट मात्र स्वास्थ्य परीक्षण गराउनुपर्ने व्यवस्था गरेको छ । सोहीअनुरुप स्वास्थ्य परीक्षण गर्न इजाजतपत्र लिएका स्वास्थ्य संस्थाहरुले हरेक वर्ष नवीकरण गर्दै आएका छन् ।
प्रकाशित मिति: मंगलबार, वैशाख १२, २०८० ११:५०
-1745656903.jpeg)