काठमाडौं - श्रम, रोजगार तथा सामाजिक सुरक्षामन्त्री शरतसिंह भण्डारीले सरकार सबै किसिमका बालश्रम निवारण गर्न प्रतिबद्ध रहेको बताएका छन् । नेपालका लागि अमेरिकी राजदूत डिन आर थम्पसनसँग सोमबार मन्त्रालयमा भएको भेटवार्तामा मन्त्री भण्डारीले सबै प्रकारका बालश्रम निवारण गर्न प्रतिबद्ध रहेको बताएका हुन् ।
भेटका क्रममा मन्त्री भण्डारीले मन्त्रालयको जिम्मेवारीमा आएपश्चात् आन्तरिक एवं वैदेशिक रोजगारीको क्षेत्रलाई मर्यादित र व्यवस्थित बनाउने सन्दर्भमा प्राप्त अवसरहरुको अधिकतम उपयोग गर्दै चुनौतीहरुलाई क्रमशः न्यूनीकरण गर्दै लैजाने बताए । उनले अमेरिकन सरकारका तर्फबाट युएसआइडी, एमसिसीजस्ता परियोजनामार्फत नेपालको विभिन्न क्षेत्रमा प्राप्त सहयोगका लागि धन्यवाद व्यक्त गरे ।
मन्त्री भण्डारीले अमेरिकाको श्रम विभागले सार्वजनिक गरेको प्रतिवेदनको सन्दर्भमा नेपाल बालश्रम निवारण गर्न प्रतिबद्ध रहेको बताउँदै नेपालले आफ्नो प्रतिवेदनसमेत अमेरिकाको श्रम विभागमा प्रेषित गरेको राजदूत थम्पसनलाई जानकारी गराए ।
यसैगरी रोजगारीको क्षेत्रमा देखापरेका विविध समस्या, चुनौती, ठगीलगायतका विषयलाई न्यूनीकरण गर्न आफू निरन्तर लागिरहेको बताउँदै उनले सीपयुक्त जनशक्ति उत्पादन गर्ने र विशिष्टीकृत सीपलाई अन्तर्राष्ट्रियस्तरमा पुर्याउनु आफ्नो प्राथमिकतामा रहेको बताए ।
द्विपक्षीय भेटका क्रममा राजदूत थम्पसनले नेपाल र अमेरिकाबीच विविध क्षेत्रमा भएको सहकार्य प्रशंसनीय रहेको बताउँदै एमसिसी परियोजना सहजरुपमा अगाडि बढेकोमा खुसी व्यक्त गरे । उनले युएसआइडी कार्यक्रमको समयावधि थप भएको जानकारी गराउँदै वैदेशिक रोजगारीका क्रममा देखापर्ने मानव तस्करीलगायतका समस्या समाधानका लागि नेपालले चाल्ने कदममा अमेरिकी सरकारको सदैव सहयोग रहने प्रतिबद्धतासमेत व्यक्त गरे । राजदूत थम्पसनले वैदेशिक रोजगारीमा नेपाली श्रमिकहरुले प्रदर्शन गरेको अनुशासन एवं इमान्दारिताको उच्च प्रशंसा गरेको मन्त्रालयले जनाएको छ ।
