काठमाडौं– श्रम, रोजगार तथा सामाजिक सुरक्षामन्त्री शरतसिंह भण्डारीले वैदेशिक रोजगार व्यवसायीहरुलाई आपत्कालीन अवस्थामा सहयोगका लागि कोष व्यवस्था गर्न लागिएको बताएका छन् । यसका लागि टिओआर (टर्मस् अफ रिफ्रेन्स) तयार गरिने उनले बताए ।
जब्स ग्लोबल डट कमका सञ्चालक चन्द्रसिं अदैको उपचारका लागि नेपाल वैदेशिक रोजगार व्यवसायी संघले संकलन गरेको रकम हस्तान्तरण गर्ने क्रममा बिहीबार मन्त्री भण्डारी सो कुरा बताएका हुन् ।
‘मन्त्रालयले एउटा समिति नै बनाएर टिओआर तयारी प्रक्रिया अघि बढाइसकेको छ,’ मन्त्री भण्डारीले भने, ‘व्यवसायीलाई परिआएका समस्या समाधान गर्न यसले मद्दत पु¥याउँछ, यसबारे छिट्टै टुंगो लाग्छ ।’ संघले लामो समयदेखि व्यवसायीहरुका लागि कोष बनाउन सरकारसँग माग गर्दै आएको थियो ।
मन्त्री भण्डारीले श्रमिक र व्यवसायी दुवैको हितमा हुनेगरी काम गर्ने प्रतिबद्धता व्यक्त गरे ।व्यवसायीले राखेको धरौटी रकमको ब्याजबापत आउने रकम व्यवसायीको हितमा उपयोग हुन नसकेको भन्दै संघले मन्त्रालयको ध्यानाकर्षण गराउँदै आएको थियो ।
यसबारे संघका अध्यक्ष राजेन्द्र भण्डारीले मन्त्री भण्डारीको ध्यानाकर्षण गराएका हुन् । संघकै आग्रहमा मन्त्री भण्डारी बिहीबार नर्भिक अस्पतालमा उपचाररत अदैलाई भेट्न र सहयोग रकम हस्तान्तरण गर्न पुगेका थिए । अदैको थप उपचारका लागि संघले व्यवसायीहरुबाट संकलन गरेको पाँच लाख ५१ रुपैयाँ मन्त्री भण्डारीबाट हस्तान्तरण गरेको थियो ।
‘मन्त्रीज्यूमार्फत सहयोग रकम हस्तान्तरण गर्न पाउनु खुसीको कुरा त हुँदै हो त्यो भन्दा पनि ठूलो व्यवसायीहरुलाई परेको मर्का बुझाउनु थियो,’ संघका महासिचव मेघनाथ भुर्तेलले भने ।संघका तृतीय उपाध्यक्ष रोशन कटुवालको सयोजकत्वमा गठित सामाजिक उत्तरदायित्व समितिले सहयोग रकम संकलन गरेको हो ।
अदैको उपचारका लागि सहयोगी मनहरुलाई धन्यवाद दिँदै आगामी दिनमा पनि सामाजिक उत्तरदायित्वअन्तर्गत संघले निरन्तर कल्याणकारी कार्यहरु गर्दै जाने उपाध्यक्ष कटुवालले बताए । सहयोग हस्तान्तरण कार्यक्रममा संघका द्वितीय उपाध्यक्ष सञ्जु गुरुङ, सचिव कर्णराज कटुवाल, कोषाध्यक्ष सरिता घलेलगायतको उपस्थित रहेको थियो ।
