काठमाडौं - कतारस्थित नेपाली दूतावासले यही वैशाख १२ गतेदेखि पुनः श्रम स्वीकृति सेवा सुरु गर्ने भएको छ । दूतावासले नेपाल सरकारको निर्णयअनुसार कतारमा रहेका नेपाली श्रमिकहरुलाई वैशाख १२ गतेदेखि उक्त सेवा प्रदान गर्ने भएको हो ।
सरकारले विदेशमा रहेका श्रमिकको सहजताका लागि भन्दै गन्तव्य मुलुकबाटै पुनः श्रम स्वीकृति दिने निर्णय गरेको थियो । नेपाली नियोगबाट श्रम स्वीकृति दिनसक्ने भएपछि दूतावासले दैनिक ५० वटासम्म श्रम स्वीकृतिको टोकन खुलाउने जनाएको छ ।
यसका लागि दूतावासमा उपस्थिति जनाउनु नपर्ने बताइएको छ । दूतावासले पुनः श्रम स्वीकृति लिनका लागि अनलाइनबाटै आवेदन दिन आग्रह गरेको छ । आवेदन दिँदा राहदानी, कतारी आइडी कार्ड, करार सम्झौतापत्र, पुरानो श्रम स्वीकृति, कतार गएको मिति प्रस्ट देखिने कागजात अपलोड गर्नुपर्ने उल्लेख गरिएको छ ।
अनलाइन आवेदन दिनका लागि सरकारले बनाएको अनलाइन सफ्टवेयर वैदेशिक रोजगार व्यवस्थापन (फेइम्स्) प्रणालीमा आबद्ध हुनुपर्ने दूतावासले जनाएको छ । अनलाइनबाट सबै प्रक्रिया पूरा भएपछि अन्तिममा श्रम स्वीकृति दिने ठाउँमा दोहा, कतार भनेर छनोट गर्न सुझाइएको छ ।
पुनः श्रम स्वीकृतिका लागि कल्याणकारी कोष, जीवन बिमा र सामाजिक सुरक्षा कोषमा रकम बुझाउनुपर्नेछ । जसका लागि कनेक्ट आइपिएस, इ–सेवा र खल्तीलगायत एपहरुको माध्यमबाट रकम बुझाउन सकिने दूतावासले जनाएको छ । यसबारे नबुझे वा थप जानकारी लिन युट्युबमा आधिकारिक ट्युटोरियल भिडियोसमेत हेर्न सकिने बताइएको छ ।
प्रकाशित मिति: शुक्रबार, वैशाख ८, २०८० १०:५३
-1745656903.jpeg)