काठमाडौं- प्रधानमन्त्री पुष्पकमल दाहालले प्रवासमा रहेका नेपालीहरुलाई विदेशबाट मतदान गर्न पाउने व्यवस्था गरिने बताएका छन् । नेकपा माओवादी केन्द्र प्रवास समन्वय समितिको ‘भर्चुअल’ कार्यक्रमलाई शुक्रबार राति सम्बोधन गर्दै उनले यसबाट विदेशमा रहेका लाखौं नेपाली लाभान्वित हुने र मताधिकारको प्रयोगबाट वञ्चित हुनु नपर्ने बताएका हुन् ।
उनले विदेशमा रहेका नेपालीले पठाएको विप्रेषणबाट विदेशी मुद्राको सञ्चितिमा उत्साह थपेको जनाउँदै वैदेशिक रोजगारीको सुधारका लागि सरकारले धेरै काम गरिसकेको र अझै थप गर्ने बताए । प्रधानमन्त्री दाहालले भने, ‘वैदेशिक रोजगारीबाट प्राप्त विप्रेषणले विदेशी मुद्रा सञ्चिति ११ महिनालाई धान्ने अवस्थामा पुग्नु आफैंमा अर्थतन्त्र सुधारको संकेत हो ।’
उनले सामाजिक सुरक्षा कोषमा प्रवासी नेपालीको आबद्धता श्रमिकको सुरक्षा भएको बताए । उनले राज्यका सबै निकायलाई राम्रोसँग परिचालन गरेर राजस्वमा उल्लेख्य सुधार भएको उल्लेख गर्दै आफू प्रधानमन्त्री बनेपछि सार्वजनिक सहकारी र निजी क्षेत्रको समन्वयलाई अगाडि बढाउन र निजी क्षेत्रलाई आर्थिक विकास निर्माणमा परिचालन गर्न जोड दिए ।
प्रकाशित मिति: आइतबार, वैशाख ३, २०८० १२:४३
-1745656903.jpeg)