काठमाडौं - वैदेशिक रोजगार बोर्ड सचिवालयले वैदेशिक रोजगारीमा रहेकाहरुलाई लक्षित गरी टेलिमेडिसिन सेवा सुरु गरेको करिब दुई हप्तामा १३७ जना नेपाली कामदारले सेवा लिएका छन् ।
बोर्ड सचिवालयले रोजगारीका लागि विभिन्न गन्तव्य मुलुकमा पुगेका नेपाली श्रमिकहरुले आफ्नो स्वास्थ्य समस्या समाधानका लागि टेलिमेडिसिन सेवा लिएको उल्लेख गरेको हो ।
बोर्डले यही चैत १५ गतेदेखि विदेशमा रहेका नेपाली कामदारहरुलाई स्वास्थ्य परामर्श प्रदान गर्ने उद्देश्यले वीर अस्पतालसँगको सहकार्यमा टेलिमेडिसिन सेवा सञ्चालनमा ल्याएको थियो । यो सेवाका लागि सबैभन्दा बढी संयुक्त अरब इमिरेट्स (युएई), साउदी अरेबिया र कतारमा रहेका नेपाली कामदारले टेलिफोन सम्पर्क गरेको बोर्डले जनाएको छ ।
त्यस्तै मलेसियाबाट थोरै कामदारले मात्रै उक्त सेवा लिएको बताइएको छ । ‘सरदरमा दैनिक १५ देखि २० जनाले आफ्नो स्वास्थ्य समस्याबारे जानकारी लिन फोन सम्पर्क गरिरहेका छन्,’ बोर्डका निर्देशक एवं सूचना अधिकारी राजन पौडेलले भने, ‘स्वास्थ्यसम्बन्धी गम्भीर समस्या देखिएका १३ जनालाई विशेषज्ञ सेवा दिइसकेका छौं ।’ आगामी दिनमा स्वास्थ्य परामर्श तथा विशेषज्ञ सेवा लिने कामदारको संख्या उल्लेख्य मात्रामा बढ्ने देखिएको उनले जानकारी दिए ।
बोर्डले विदेशमा रहेका नेपाली कामदारले ९८५१३४५७०१ र ९८५१३४५७०२ नम्बरमा भाइवर, ह्वाट्सएप वा इमोमार्फत फोन गरी आफ्नो स्वास्थ्य समस्या राख्न सक्ने व्यवस्था गरेको छ । यसका लागि उनीहरुले सार्वजनिक विदाको दिनबाहेक नेपाली समयानुसार विहान १० देखि बेलुका ५ बजेसम्म सम्पर्क गर्न सक्ने जनाइएको छ । सेवा प्रवाहका लागि खटिएका मेडिकल अधिकृतले फोनमार्फत नै कामदारको स्वास्थ्य समस्या र जिज्ञासा हल गर्ने प्रयास गर्ने छन् ।
यदि मेडिकल अधिकृतले समाधान गर्न नसक्ने स्वास्थ्य समस्या भएमा रोगका लक्षणअनुसार बिरामीलाई विशेषज्ञ डक्टरबाटै समस्या समाधानका लागि परामर्श दिइनेछ । जटिल स्वास्थ्य समस्या भएका बिरामीले प्रत्येक हप्ता आइतबार र शुक्रबार विशेषज्ञ सेवा लिन सक्ने बोर्डले जनाएको छ । निरन्तर सञ्चालन हुने यस कार्यक्रमबाट रोजगारीका लागि विदेशमा रहेका नेपालीहरु लाभान्वित हुने पौडेलले बताए ।
प्रकाशित मिति: मंगलबार, चैत २८, २०७९ ११:५८
-1752335779.jpg)
