काठमाडौं - वैदेशिक रोजगारीको सिलसिलामा नेपाली श्रमिकको मृत्यु भएमा प्राप्त हुने बिमा रकम ठगी प्रकरणमा थप एक जनालाई प्रहरीले पक्राउ गरेको छ । मृत्यु भएका आफन्तले पाउने बिमा रकम ठगीमा संलग्न रहेको अभियोगमा सूर्यज्योति जीवन बिमा कम्पनीमा कार्यरत उमेश बुढाथोकीलाई पक्राउ गरिएको हो ।
बिमा कम्पनीमा जुनियर अधिकृतको रुपमा कार्यरत बुढाथोकीले बिमा रकम ठगीमा सहजीकरण गर्ने गरेको बुझिएको छ । यसअघि प्रहरीले बिमा रकम ठगीमा संलग्न एक जना सरकारी कर्मचारीसहित सात जनालाई पक्राउ गरेको थियो ।
प्रहरीले ठगीमा संलग्न गिरोहको बयानका आधारमा वैदेशिक रोजगार बोर्डमा कार्यरत नायव सुब्बा (नासु) पशुपति अधिकारीलाई पक्राउ गरेको थियो । पक्राउ परेकाहरुकै थप बयानबाट बिमा कम्पनीमा कार्यरत बुढाथोकीको पनि संलग्नता खुल्न आएपछि नियन्त्रणमा लिइएको काठमाडौं उपत्यका अपराध अनुसन्धान कार्यालयका प्रहरी उपरीक्षक (एसपी) रविन्द्र रेग्मीले बताए ।
प्रहरीले शुक्रबार नै पत्रकार सम्मेलन गरी बिमा रकम ठगीधन्दामा सलग्नहरुलाई सार्वजनिक गरेको थियो । पक्राउ परेकाहरुले विदेशमा मृत्यु भएकाहरुको परिवारलाई प्रभावमा पारी सरकारी व्यवस्थाअनुसार स्वतः प्राप्त हुने बिमा रकमको (१३–१४ लाख रुपैयाँ) ५० प्रतिशतभन्दा बढी अर्थात् आठ लाख रुपैयाँसम्म ठगी गरेको खुल्न आएको प्रहरीले उल्लेख गरेको छ ।
सरकारले वैदेशिक रोजगारीको क्रममा विदेशमा नै मृत्यु भए मृतकका परिवारलाई १४ लाख रुपैयाँ र नेपाल फर्किएर एक वर्षभित्र मृत्यु भएमा १३ लाख रुपैयाँ दिने व्यवस्था गरेको छ ।ठगीमा संलग्नहरुले बोर्डका नासु अधिकारीसँग आवश्यक सूचना लिने र मृत्यु भएका व्यक्तिको परिवारसम्म पुगी बिमा रकम भुक्तानीका लागि सहयोग गरिदिने भन्दै प्रभावमा पार्ने गरेको पाइएको छ ।
नासु अधिकारी एक हप्ताअघि मात्रै श्रम, रोजगार तथा सामाजिक मन्त्रालयबाट बोर्डमा सरुवा भएका कर्मचारी हुन् । उनले मन्त्रालयमा हुँदादेखि नै ठगीमा संलग्नहरुलाई आवश्यक सूचना उपलब्ध गराउँदै आएको बताइएको छ ।ठगी गर्ने गिरोहले विदेशमा मात्र नभई नेपाल फर्किएर मृत्यु भएका मृतकका परिवारलाईसमेत प्रभावमा पार्ने र बिमा रकममा ठगी गर्ने गरेको देखिएको छ ।
उनीहरुले धेरैजसो मधेस प्रदेशका व्यक्तिलाई लक्षित गरेको र मृतकका परिवारलाई काठमाडौं ल्याएर राखी बिमा रकम भुक्तानी गराई ठगी गर्ने गरेको प्रहरी अनुसन्धाबाट खुलेको छ । प्रहरीले अहिलेसम्म बोर्डका नासु अधिकारी, बिमा कम्पनीका कर्मचारी बुढाथोकीसहित रामबहादुर तामाङ, विनोदकुमार लामा, डिकबहादुर मल्ल, रविन भन्ने रवीन्द्र मोक्तान, प्रकाशबहादुर गोले र रुद्रमान गोले गरी ८ जनालाई पक्राउ गरेको छ ।
