काठमाडौं - नेपाल वैदेशिक रोजगार व्यवसायी नेवाः समाजमा नयाँ कार्यसमिति चयन भएको छ । शुक्रबार राजधानीमा सम्पन्न चौथो साधारणसभाले किसन प्रधानको अध्यक्षतामा नयाँ कार्यसमिति निर्विरोध चयन गरेको हो ।
वैदेशिक रोजगार व्यवसायमा सक्रिय नेवार व्यवसायीहरुको साझा संस्था नेवाः समाजको अध्यक्षमा प्रधान, प्रथम उपाध्यक्षमा विजयराज श्रेष्ठ, द्वितीय उपाध्यक्षमा दिनेश श्रेष्ठ, तृतीय उपाध्यक्षमा प्रविन श्रेष्ठ, महासचिवमा देवेन्द्रनारायण श्रेष्ठ, सचिवमा गगन श्रेष्ठ र कोषाध्यक्षमा मोतीलक्ष्मी श्रेष्ठ चयन भएका छन् ।
यस्तै कार्यसमिति सदस्यहरुमा अमितकुमार श्रेष्ठ, कृष्णभक्त श्रेष्ठ, चन्द्रकुमार श्रेष्ठ, सन्तोष श्रेष्ठ रहेका छन् । सोही अवसर पारेर नेवाः समाजले नेपाल वैदेशिक रोजगार व्यवसायी संघका संस्थापक एवं पूर्वअध्यक्ष पुष्पलाल महर्जनलाई दोसल्ला ओढाएर सम्मान गरेको छ । साथै समाजमा आबद्ध केही सदस्यहरुलाई पनि सम्मान गर्दै सदस्यता प्रमाणपत्र दिइएको छ ।
कार्यक्रमको प्रमुख अतिथि रहेका राष्ट्रिय नेवाः दवूका अध्यक्ष पवित्रमान बज्राचार्यले नयाँ कार्यसमितिलाई बधाई तथा शुभकामना दिंदै वैदेशिक रोजगारीको पेसालाई हेर्ने दृष्टिकोणमा अझै परिवर्तन आइनसकेको भन्दै यसलाई व्यवस्थित, मर्यादित र सम्मानित बनाउन व्यवसायीले नै भूमिका खेल्नुपर्ने बताए ।
यस्तै वैदेशिक रोजगार व्यवसायी संघका अध्यक्ष राजेन्द्र भण्डारीले व्यवसायीहरुको थुप्रै समस्या रहेको भन्दै यसको समाधानको लागि सबै एकजुट भएर लाग्नुपर्ने बताए । उनले व्यवसायीको हकहितका निम्ती जस्तोसुकै परिस्थितिको सामना गर्न संघ तयार रहेको बताए ।
त्यसैगरी व्यवसायीहरुका विभिन्न घटक, भेगिय, क्षेत्रिय, जातीय संस्थाका अध्यक्ष एवं प्रतिनिधिहरुले पनि व्यवसायीक सुरक्षाको लागि एकअर्कामा हातेमालो गर्दै अघि बढनुपर्नेमा जोड दिए ।
