काठमाडौं - प्रतिनिधिसभा सदस्य एलपी साँवा लिम्बूले वैदेशिक रोजगारीलाई व्यवस्थित, मर्यादित र सुरक्षित बनाउन व्यवसायी स्वयं सचेत हुनुपर्ने बताएका छन् । प्रगतिशील वैदेशिक रोजगार व्यवसायी मञ्च नेपालले नयाँ वर्ष २०८० को अवसरमा शुक्रबार आयोजना गरेको शुभकामना आदानप्रदान कार्यक्रममा उनले सो कुरा बताएका हुन् ।
सांसद लिम्बूले बाहिर हल्ला गरिएजस्तो मुलुक आर्थिक संकटमा नफसेको भएपनि आर्थिक मन्दीका कारण पेसा व्यवसाय सञ्चालनमा सचेत हुनुपर्ने बताए । उनले अस्पताल, खाद्यान्न, विद्यालय र वैदेशिक रोजगार जस्तोसुकै कठिन परिस्थितिमा पनि चलिराख्ने बताए ।
नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले मञ्चले सञ्चालन गर्ने रचनात्मक गतिविधिले वैदेशिक रोजगारीका क्षेत्रमा टेवा पुग्ने बताए । उनले व्यवसायीक हितका निम्ती मञ्चबाट सकारात्मक सुझाब सल्लाह र सहयोग मिल्ने विश्वास व्यक्त गरे ।
यसैगरी मञ्चका अध्यक्ष जनक रावलले नयाँ वर्षमा नयाँ क्यालेण्डर अनुसार मञ्चले विभिन्न गतिविधि सञ्चालन गर्ने बताए । उनले वैशाख महिनामा नै व्यवसायीले भोग्नुपरेको समस्या र वैदेशिक रोजगार ऐन २०६४ को संशोधनलगायतका विषयमा बृहत् अन्तरक्रिया कार्यक्रम सञ्चालन गर्ने जानकारी दिए ।
उनले मञ्चमा आबद्ध व्यवसायीको मात्र नभई समग्र व्यवसायीको समस्या समाधानका लागि क्रियाशील रहने प्रतिबद्धता व्यक्त गरे ।सोही कार्यक्रममा मञ्द्वारा प्रकाशित नयाँ वर्षको क्यालेण्डर सार्वजनिक गरिएको थियो । कार्यक्रममा वैदेशिक रोजगारका क्षेत्रमा क्रियाशील विभिन्न घटक, भेगीय, क्षेत्रीय र जातीय संस्थाका अध्यक्ष तथा प्रतिनिधिहरुको सहभागिता रहेको थियो ।
प्रकाशित मिति: आइतबार, चैत २६, २०७९ ०९:४१
-1745656903.jpeg)