काठमाडौं - गठबन्धन सरकारले प्रस्तुत गरेको ‘संयुक्त सरकारको प्राथमिकता र न्यूनतम साझा कार्यक्रम’मा वैदेशिक रोजगारीको क्षेत्रलाई प्राथमिकताका साथ समेटिएको छ ।
वैदेशिक रोजगारीलाई व्यवस्थित, मर्यादित, सुरक्षित र पारदर्शी बनाउने उदेश्यका साथ साझा न्युनतम कार्यक्रम’मा समेटिएको गठबन्धन सरकारले जनाएको छ ।
सरकारले विदेशमा काम गर्ने श्रमिकहरूलाई योगदानमा आधारित सामाजिक सुरक्षा योजनामा आबद्ध गराई उनीहरूको आर्थिक तथा सामाजिक जोखिमलाई न्यूनीकरण गर्ने कार्यक्रम तय गरेको छ ।
सामाजिक सुरक्षा कार्यक्रमलाई अर्थतन्त्रका औपचारिक क्षेत्रका अतिरिक्त अनौपचारिक तथा स्वरोजगार र वैदेशिक रोजगारीका क्षेत्रमा विस्तार गर्ने लक्ष्य राखिएको छ ।
यस्तै सरकारले वैदेशिक रोजगारीलाई सुरक्षित, मर्यादित र पारदर्शी बनाउन तथा सेवाग्राहीलाई नजिकको स्थानबाटै सेवा प्रदान गर्ने जनाएको छ । यसका लागि प्रत्येक पालिकामा रहेका रोजगार सेवा केन्द्रमार्फत श्रम स्वीकृतिका लागि आवेदन दिने व्यवस्था मिलाउने बताइएको छ ।
साथै विदेशमा रहेका श्रमिकको समस्या हल गर्न मन्त्रालयमा भएको हटलाइन कल सेन्टरलाई प्रभावकारी बनाउने र मोबाइल एप्समार्फत निगरानी गर्ने व्यवस्था मिलाउने कार्यक्रममा समावेस गरिएको छ ।
आपसी संवाद, सहमति र सहकार्यमार्फत साझा न्यूनतम कार्यक्रम लागू गरिने संयुक्त सरकार गठनका लागि पहल तथा समर्थन गर्ने प्रतिबद्धता दलहरूले जनाएका छन् ।
गठबन्धनको संस्कृति विकास गरी देशमा राजनीतिक स्थायित्व प्रदान गर्न गठबन्धन दलहरू सहमत भएको उल्लेख गरिएको छ ।
