काठमाडौं- वैदेशिक रोजगारीमा गएका नेपाली श्रमिकहरुको समस्या समाधानमा सरकार गम्भीर हुनुपर्ने आवाज संघीय संसद्मा उठेको छ । बिहीबार प्रतिनिधिसभाको बैठकमा सांसदहरुले उक्त विषय उठाएका हुन् । उनीहरुले श्रम आप्रवासन र वैदेशिक रोजगारीमा समस्या भोगिरहेका नेपाली श्रमिकहरुको सहयोग, उद्धार र सहजीकरणका लागि सरकारले यकीन तथ्यांक संकलन एवं ठोस कदम चाल्नुपर्नेमा जोड दिए ।
नेपाली कांग्रेसकी सांसद रमा कोइराला पौडेलले वैदेशिक रोजगारीका लागि गन्तव्य मुलुकका जेलमा रहेका नेपालीहरुको तथ्यांक राख्न र उनीहरुलाई सकुशल स्वदेश फिर्ता गराउन नसकेकोमा संसद्मार्फत सरकारको ध्यानाकर्षण गराएकी छन् । उनले जेल जीवन बिताइरहेका नेपालीहरुलाई छुटाउन सरकारले तत्काल कदम चाल्नुपर्ने माग गरिन् ।
शून्य समयमा बोल्दै सांसद कोइरालाले गन्तव्य मुलुकमा स्वास्थ्य समस्यामा परेकाहरुको उपचारमासमेत ध्यान दिन आग्रह गरिन् । श्रम आप्रवासन श्रमिकका लागि मात्र नभई देशकै लागि आवश्यक रहेकोप्रति सरकारले नै प्रतिवेदन सार्वजनिक गरिसकेको बताउँदै उनले श्रमिकलाई तत्काल राहत हुनेगरी ठोस कदम चाल्न आवश्यक रहेको उल्लेख गरिन् । उनले सरकारले अहिलेसम्म विदेश गएका नेपालीको यकीन तथ्यांक राख्न नसकेको भन्दै यसतर्फ पनि ध्यान दिन आग्रह गरिन् ।
यस्तै राष्ट्रिय प्रजातन्त्र पार्टीका सांसद दीपकबहादुर सिंहले रोजगारीका लागि विदेश पुगेर विविध समस्यामा पर्ने र दुर्घटना परी अंगभंग भएर फर्किएकाहरुलाई सरकारले नहेरेको बताए । विदेशमा काम गर्ने नेपाली श्रमिकहरुको समस्याप्रति सरकारले कुनै काम नगरेको उनको दाबी छ । सिंहले विदेशबाट बाकसमा शव फर्किएका नेपालीका परिवारका लागि के सोचेको छ ? भन्दै प्रश्नसमेत उठाए ।
वैदेशिक रोजगारीमा रहेका नेपालीले पठाएको रकमकै कारण नेपाल असफल राष्ट्र हुनबाट जोगिएको सिंहले बताए । नेपालीले कमाएको रकम नपठाएको भए मुलुक श्रीलंका वा पाकिस्तानभन्दा अगाडि नै संकटमा परिसक्ने धारणा राखे । विदेशमा रगत पसिना बगाएर कमाएर स्वदेश पठाउने तिनै लाखौं नेपालीकै कारण सांसदहरुले पनि तलवभत्ता खाइरहेको नबिर्सिन सांसद सिंहले आग्रह गरे ।
कठिन श्रम गर्नेहरुप्रति राज्यले आफ्नो उत्तरदायित्व पूरा नगरेको उनको भनाइ थियो । ‘अंगभंग भएर फर्केकाहरुको पक्षमा, मृत्यु भएका परिवारलाई राहत दिने सम्वन्धमा सरकार मौन देखिन्छ,’ सांसद सिंहले भने, ‘मृत्यु भएकाहरुको बालबालिका, विधवा श्रीमती, बाबुआमाहरुका लागि यो सरकारले के गरेको छ ?’ वर्तमान सरकारले अयोग्य लडाकूका नाममा करोडौं रकम पुनः वितरण गरेकोमा पनि सिंहले असन्तुष्टि जनाए ।
उनले त्यो रकम बाकसमा शव फर्किएकाहरुका परिवार, अंगभंग भएर स्वदेश फर्केकाहरुलाई राहत दिन प्रयोग गरिएको भए तिनिहरुले सरकारको जयजय गर्ने थिए भन्दै वैदेशिक रोजगारमा गएकाहरुको योगदानलाई नभुल्न आग्रह गरे ।राष्ट्रिय स्वतन्त्र पार्टीका सांसद हरि ढकालले पनि रोजगारीको सिलसिलामा विदेशी जेलमा भएको आफन्त खोज्न परिवारका सदस्यहरुलाई सकस परिरहेको बताए । यसको सहजीकरणका लागि उनले संसद्मार्फत सरकारको ध्यानाकर्षण गराए । विदेशबाट ल्याएको शवको बाकससमेत फोरिएको भन्दै ढकालले गरगहना वा अरु केही सामान छ कि भनेर बाकस फोरिनुले हाम्रो समाज कता जाँदै छ भन्ने प्रश्न गरे ।
०००००
