काठमाडौं- वैदेशिक रोजगार विभागले अभिमुखीकरण तालिम प्रदायक संस्थाहरुलाई प्रशिक्षार्थीहरुको विद्युतीय हाजिरी सुरक्षित नराखे कारबाही गर्ने चेतावनी दिएको छ । विभागले वैदेशिक रोजगारीमा जान अभिमुखीकरण तालिम लिने प्रशिक्षार्थीहरुको हाजिरी विद्युतीय हाजिरी प्रणालीमा सुरक्षित नराखे तालिमप्रदायक संस्थाहरुलाई कारबाही गर्ने चेतावनी दिएको हो ।
विभागले आइतबार एक सूचना जारी गर्दै अधिकांश अभिमुखीकरण तालिम प्रदायक संस्थाहरुले प्रशिक्षार्थीहरुको विद्युतीय हाजिरी डिलिट भयो भन्ने र तथ्यांक उपलब्ध नगराउने गरेका कारण अबदेखि त्यस्तो कार्य नगर्न र विद्युतीय हाजिरी सुरक्षित राख्न निर्देशन दिएको छ ।
‘अभिमुखीकरण तालिम सञ्चालन कार्यविधि, २०७६ को दफा ५ बमोजिम तालिम सञ्चालन गर्दा प्रशिक्षार्थीहरुको तालिम कक्षामा उपस्थिति र प्रस्थान समयको विद्युतीय हाजिरीको दैनिक अभिलेख राख्नुपर्छ । तालिम अवधि समाप्त भएपछि संयोजकबाट प्रमाणित गराइ अनलाइन माध्यमबाट सचिवालय र विभागमा पठाउनुपर्ने व्यवस्था छ ।
यस्तै तालिम प्रदायक संस्था विभागको वैदेशिक राजगारी सम्बन्धी सूचना व्यवस्थापन प्रणालीसँग आबद्ध भएको हुनुपर्छ,’ विभागद्वारा जारी सूचनामा उल्लेख छ ।यस्तो व्यवस्था हुँदाहुँदै तालिम प्रदायक संस्थाले विद्युतीय हाजिरीको दैनिक अभिलेख, विद्युतीय हाजिरी प्रणालीबाट दैनिकरुपमा हटाइने गरेको पाइएको विभागले जनाएको छ ।
तालिम लिएका कम्तीमा ३० दिनसम्म हाजिरीको ‘व्याकअप’ सुरक्षित राख्न विभागले सचेत गराएको छ । यसअघि पनि विभागले अभिमुखीकरण तालिम प्रदायक संस्थाहरुलाई मापदण्डअनुरुप सञ्चालन नभएको र प्रशिक्षार्थीहरुको यकीन विवरण उपलब्ध नगराएको भन्दै कारबाही गर्ने चेतावनी दिएको थियो ।
