काठमाडौं - चालु आर्थिक वर्षको आठौं महिना अर्थात् फागुनमा वैदेशिक रोजगारीका लागि करिब ६२ हजार नेपालीले श्रम स्वीकृति लिएका छन् । वैदेशिक रोजगार विभागले सार्वजनिक गरेको विवरणअनुसार फागुनमा रोजगारीका लागि विदेश जान ६१ हजार ८४५ जना नेपालीले अन्तिम श्रम स्वीकृति लिएका हुन् ।
विभागको तथ्यांकअनुसार फागुनमा रोजगारीका लागि विदेशिने नेपालीहरुको संख्या माघको भन्दा दुई हजार ४३९ ले कम हो । माघमा ६४ हजार २८४ जनाले रोजगारीका लागि विदेश जान श्रम स्वीकृति लिएको विभागको तथ्यांकले देखाएको छ ।
यसभन्दा अघिल्लो महिना पुसमा ६५ हजार ४६४ जनाले श्रम स्वीकृति लिएका थिए । अझ मंसिर महिनामा ६८ हजारभन्दा बढीले श्रम स्वीकृति लिएको देखिन्छ । गत आर्थिक वर्षबाट पुरानै लयमा फर्किएको वैदेशिक रोजगारीको यात्रा मंसिरबाट खस्किँदै गएको विभागको तथ्यांकले देखाएको छ ।
चालु आवको सुरुआतदेखि नै पहिलो गन्तव्य बनेको मलेसिया जाने नेपाली कामदारहरुको संख्या पनि खस्किँदै गएको देखिएको छ । माघ महिनाको तुलनामा फागुनमा ४१ जना बढी अर्थात् १९ हजार ८२४ जनाले श्रम स्वीकृति लिए पनि अघिल्ला महिनाहरुको तुलनामा न्यून रहेको विभागको तथ्यांकमा उल्लेख छ ।
पुसमा २० हजार ३३९ र मंसिरमा ३० हजार ५४० जनाले मलेसिया जना श्रम स्वीकृति लिएका थिए ।यद्यपि, विभागले दिएको श्रम स्वीकृतिको आधारमा विदेशिने नेपालीहरुका लागि अझै पनि मलेसिया अन्य मुलुकभन्दा अग्रस्थानमा रहेको छ । गत आवमा पाँचौं श्रम गन्तव्य बन्न पुगेको मलेसियाले यस वर्ष निरन्तर पहिलो स्थान ओगटेको छ ।
आप्रवासी कामदारको चर्को अभाव झेलिरहेको मलेसियाले नेपाली कामदारलाई प्राथमिकता दिँदै आएको छ भने नेपालबाट अधिक कामदार आपूर्ति गर्ने नीति लिएको छ ।यसैगरी फागुन महिनामा रोजगारीका लागि कतार जान ११ हजार ३०३ जनाले श्रम स्वीकृति लिएका छन् ।
कतार जाने नेपालीहरुको संख्यामा पनि क्रमिकरुपमा गिरावट आएको देखिन्छ । विभागको तथ्यांकअनुसार कतार जान गत माघ महिनामा १२ हजार ७०४ जनाले स्वीकृति लिएका थिए भने अघिल्लो पुस महिनामा १३ हजार ६६ जनाले श्रम स्वीकृति लिएको उल्लेख छ ।
यस्तै संयुक्त अरब इमिरेट्स (युएई)मा नौ हजार ७९५, साउदी अरेबियामा नौ हजार ५०३ र कुवेतमा दुई हजार ४६२ जनाले श्रम स्वीकृति लिएको विभागले जनाएको छ । साउदी र कुवेत जाने नेपालीको संख्यामा गत महिनाभन्दा गिरावट आएको देखिन्छ ।
उल्लिखित यी पाँच देशमा जाने नेपाली कामदारको संख्यामा कमी आए पनि वैदेशिक रोजगारको ठूलो हिस्सा ओगटेको विभागको तथ्यांकले देखाएको छ ।त्यस्तै माल्टामा २७०, रोमानियामा एक हजार ७०, पोल्याण्ड ६००, बहराइनमा ५९५, जापानमा ८७१, क्रोएसियामा ५५७, साइप्रसमा ४५५ र ओमानमा ४६५ जनाले रोजगारीमा जानका लागि श्रम स्वीकृति लिएका छन् । श्रम स्वीकृति लिएर युरोपेली मुलुक जाने नेपालीको संख्या पनि घट्दै गएको विभागको तथ्यांकले देखाएको छ ।
यस्तै इपिएस प्रणालीबाहेक श्रम स्वीकृति लिएर दक्षिण कोरिया जाने नेपालीको संख्या दुई हजार २२७ रहेको छ ।विभागबाट कूल श्रम स्वीकृति लिनेमध्ये पुनः श्रम स्वीकृति लिने २४ हजार ८५१ जना छन् । पहिलोपटक विदेश जान श्रम स्वीकृति लिनेको संख्या ३६ हजार ९९४ जना रहेको छ ।
समग्रमा रोजगारीका लागि विदेश जान फागुन महिनामा श्रम स्वीकृति लिनेमध्ये पाँच हजार १२६ जना महिला रहेको विभागले उल्लेख गरेको छ ।विभागले सार्वजनिक गरेको तथ्यांकअनुसार जिल्लागतरुपमा धनुषाबाट सबैभन्दा बढी रोजगारीका लागि श्रम स्वीकृति लिएको देखिन्छ भने झापा दोस्रो स्थानमा रहेको छ ।
यस्तै मोरङ र सिरहा तेस्रो र चौथो छन् भने महोत्तरी पाँचौ स्थानमा रहेको छ । सुनसरी, सर्लाही, बारा, रौतहट, पर्सा र सप्तरीबाट पनि विदेश जानेको संख्या ठूलो रहेको छ । रुपन्देही, तनहुँ, कपिलवस्तु, मकवानपुर, दाङ, डडेलधुरा, चितवन, बागलुङ, स्याङ्जा र नवलपरासी पूर्वबाट पनि उल्लेख्य मात्रामा नेपालीहरु विदेश गएको विभागले जनाएको छ ।
उल्लिखित जिल्लाहरुबाट एक हजारदेखि तीन हजार २०० को हारहारीमा रोजगारीका लागि नेपालीहरु विदेसिएका छन् । चालु आर्थिक वर्षको सुरुदेखि नै रोजगारीका लागि विदेशिने नेपालीको संख्यामा वृद्धि हुँदा यो आठ महिनाको अवधिमा पाँच लाख ४२ हजारले श्रम स्वीकृति लिएको विभागले जनाएको छ । यस अवधिमा सबैभन्दा बढी कात्तिक महिनामा ७८ हजार बढीले श्रम स्वीकृति लिएको विभागको तथ्यांकले देखाएको छ ।
स्रोतः वैदेशिक रोजगार विभाग
