काठमाडौं - कोरियन भाषा परीक्षा सञ्चालनका लागि ललितपुरको भैंसेपाटीमा इपिएस भाषा परीक्षा भवन तयार भएको छ । नेपाल सरकार तथा कोरिया सरकारबीच भएको श्रम समझदारी (जिटुजी) अनुसार रोजगार अनुमति प्रणाली (इपिएस) अन्तर्गत कोरिया जाने नेपाली श्रमिकहरुका लागि कोरियन भाषा परीक्षा (इपिएस टोपिक) सञ्चालनका लागि युबिक्युसिअस बेस्ड टेस्ट बिल्डिङ तयार भएको हो । उक्त बिल्डिङ नेपाल र कोरिया सरकारको संयुक्त लगानीमा तयार भएको बताइएको छ ।
भाषा परीक्षा सञ्चालन गर्न तयार पारिएको उक्त प्रविधियुक्त भवन श्रम रोजगार तथा सामाजिक सुरक्षा मन्त्रालयका सचिव एकनारायण अर्याल र एचआरडी कोरियाका उपप्रमुख किम सङ जेले संयुक्त रुपमा भवन उद्घाटन गरेका छन् ।
उक्त कार्यक्रममा श्रमसचिव अर्यालले दुवै मुलुकले एकअर्को देशलाई विकास र उन्नतिका लागि गरेको सहयोगको उच्च प्रशंसा गर्दै इपिएसमार्फत २००८ देखि हालसम्म ८५ हजार नेपाली कामदार कोरिया पुगेको बताए ।
‘तथ्यांकअनुसार हाल कोरियामा ४५ हजार कार्यरत रहेका छन् भने करिव ४० हजार नेपाली आफ्नो कार्यकाल सकेर नेपाल फर्किएका छन्,’ उनले भने । कोरियाबाट फर्किएका नेपाली कामदारहरुले नेपालमा आफूले सिकेको ज्ञान र सीपको प्रयोग गरिरहेको सचिव अर्यालले वताए ।
साथै, प्रविधियुक्त भवनबाट कोरियन भाषा परीक्षा उच्च प्रविधियुक्त, मर्यादित, पारदर्शी, सुरक्षित, निष्पक्ष रहने विश्वास व्यक्त गरे । उनले दुई देशबीचको सम्बन्ध अझै सुदृढ र प्रभावकारी बन्न गई इपिएसमार्फत दक्षिण कोरिया जाने नेपाली श्रमिकहरुको संख्यामा वढोत्तरी हुने बताए ।
एचआरडी कोरियाका उपप्रमुख किमले नेपाल सरकार र कोरिया सरकारबीच भएको श्रम समझदारीअनुसार नयाँ भवनलाई अभिन्न अंगकोरुपमा लिएको बताए । उनले उक्त भवन सञ्चालनमा आएपश्चात् नेपालमा हुने इपिएस टोपिक परीक्षा निष्पक्ष, मर्यादित, विश्वसनीय एवं आधुनिक उच्च प्रविधियुक्त हुने बताए ।
उपप्रमुख किमले नेपालको उदाहरण दिँदै अन्य देशहरुलेसमेत आगामी दिनमा अनुसरण गर्नलायक भएको र नेपालबाट कोरिया भित्रिने नेपाली कामदारहरुको संख्या बढ्नुले दुवै देश लाभान्वित हुने विश्वास व्यक्त गरे । किमले नेपालबाट हाल इपिएसमार्फत कामदार छिटो छरितो एवं व्यवस्थित ढंगबाट पठाउने कार्य भइरहेकोमा खुसीसमेत व्यक्त गरे ।
प्रकाशित मिति: बिहीबार, फागुन २५, २०७९ ०९:०३
-1752335779.jpg)
