काठमाडौं– श्रम, रोजगार तथा सामाजिक सुरक्षा मन्त्रालयका सचिव एकनारायण अर्यालले नेपाली श्रमिकहरुको हकहित तथा संरक्षणमा श्रम गन्तव्य मुलुकले विशेष ध्यान दिनुपर्ने बताएका छन् ।
उनले संयुक्त अरब इमिरेट्स(युएई)को दुबईमा भएको विभिन्न देशका सरकार प्रमुखहरुको ‘वल्र्ड गभर्मेन्ट समिट’मा भाग लिनेक्रममा नेपाली श्रमिकहरुले विभिन्न बहानामा समस्या भोगिरहेकाले उनीहरुको सुरक्षा र संरक्षणमा सम्बन्धित देशका प्रमुखहरुले ध्यान दिनुपर्ने बताएका हुन् ।
मध्य एसियाली देशहरूमा केन्द्रित रहेर श्रमबजारको अवस्था तथा श्रमिकका हकहितका सम्बन्धमा समूहगतरुपमा भएको छलफलमा सचिव अर्यालले दिगो विकास, सेवा प्रवाहमा नवीनतम प्रयोग, श्रमबजार, नयाँ प्रविधि, जलवायु परिवर्तनलगायतका विषयमा भनाइ राखेका थिए ।
‘नेपालले हालै वैदेशिक रोजगारका क्षेत्रको सेवा प्रवाहमा गरेको प्रविधिको प्रयोग, सामाजिक सुरक्षामा सबै नेपाली श्रमिकहरूको आबद्धता, न्यायोचित भर्ना, भर्ना प्रक्रियामा देखिएका अनियमितता हटाउने कार्य भइरहेको छ,’ उनले कार्यक्रममा भने ।
सचिव अर्यालले नेपाली श्रमिकहरूको सामाजिक सुरक्षाका विविध विषयहरूमा गन्तव्य मुलुकका सरकारहरूले ध्यान दिनुपर्नेमा जोड दिँदै व्यावसायिक तालिमको विषयलाई पनि समावेश गर्नुपर्ने बताए । सोही क्रममा उनले नेपाली श्रमिकका समस्या र समाधानका लागि संयुक्त अरब इमिरेट्सका मानव संशाधनमन्त्री डा.अब्दुलरहमान अल अवर र कतार सरकारका मानव संशाधनमन्त्री र सचिव तथा आइएलओका महानिर्देशक गिल्बर्ट होङबोसँग पनि भेटवार्ता गरेका थिए ।
फेब्रुअरी १२ देखि १५ (चार दिन) सम्म सञ्चालन भएको वल्र्ड गभर्मेन्ट समिटमा २५ भन्दा बढी देशका राष्ट्रप्रमुख र सरकार प्रमुखहरूले भाग लिएको र ९० भन्दा बढी देशको प्रतिनिधिमूलक सहभागिता रहेको मन्त्रालयले जनाएको छ ।
नेपाल सरकारको तर्फबाट सचिव अर्यालको नेतृत्वमा युएईस्थित नेपाली दूतावासका राजदूत कृष्णप्रसाद ढकाल र मन्त्रालयका उपसचिव कविराज उप्रेती सहभागी रहेको मन्त्रालयले उल्लेख गरेको छ ।
कार्यक्रममा स्रोत मुलुकहरूबीच श्रमिकहरूका समस्याका विषयमा साझा धारणा निर्माण गर्न बंगलादेश, पाकिस्तान, श्रीलंका, भियतनामका श्रममन्त्रीहरू र नेपाल सरकारका श्रमसचिवबीच छुट्टै बैठकसमेत भएको मन्त्रालयले जनाएको छ ।
प्रकाशित मिति: बिहीबार, फागुन ४, २०७९ ०८:२६
-1752335779.jpg)
