काठमाडौं - नेकपा एमालेको शुभेच्छुक संस्था प्रगतिशील वैदेशिक रोजगार व्यवसायी मञ्च नेपालले नयाँ नेतृत्व पाएको छ । मञ्चको अध्यक्षमा जनक रावल सर्वसम्मत चयन भएका छन् ।
मञ्चको अध्यक्ष रहेका राजेन्द्र भण्डारी वैदेशिक रोजगार व्यवसायी संघको अध्यक्षमा निर्वाचित भएपछि रावललाई अध्यक्ष चयन गरिएको हो । यसअघि रावल मञ्चको महासिचवको जिम्मेवारीमा थिए ।
अध्यक्ष रावल मञ्चको कार्यसमितिमा रहेर लामो अनुभव हासिल गरेका व्यक्ति हुन् । उनले मञ्चको सदस्यमा दुई कार्यकाल, उपाध्यक्षमा दुई कार्यकाल र महासचिवको जिम्मेवारी सम्हालिसकेका छन् ।
यसैगरी मञ्चको महासचिवमा मिलन कट्टेललाई चयन गरिएको छ । यसअघि उपमहासचिवको भूमिकामा रहेका कट्टेललाई महासचिवको जिम्मेवारी दिइएको मञ्चले जनाएको छ ।
उनी संघको भर्खरै सम्पन्न निर्वाचनमा मञ्चको तर्फबाट महासचिवको उम्मेदवारी दिए पनि पराजित भएका थिए ।
त्यस्तै मञ्चको सचिवको जिम्मेवारी सम्हाल्दै आएका राजेन्द्र अधिकारीलाई उपमहासचिवमा चयन गरिएको छ भने श्यामचन्द्र खतिवडालाई सचिवको जिम्मेवारी दिइएको छ ।
उल्लिखित पदहरुमा हेरफेर गरिए पनि अन्य पदाधिकारी तथा सदस्यहरुलाई यथावत् जिम्मेवारीमा राखिएको मञ्चले जनाएको छ । संघको निर्वाचनमा भण्डारी अध्यक्ष निर्वाचित भएलगत्तै मञ्चको नयाँ नेतृत्व चयनका लागि व्यवसायीहरुले आवाज उठाउँदै आएका थिए ।
प्रकाशित मिति: बुधबार, फागुन ३, २०७९ ०७:१९
-1745656903.jpeg)