काठमाडौं– नेपाल वैदेशिक रोजगार व्यवसायी संघको कार्यसमितिले पूर्णता पाएको छ । संघका अध्यक्ष राजेन्द्र भण्डारीले चार जना सदस्य मनोनीत गरेसँगै कार्यसमितिले पूर्णता पाएको हो ।
संघको विधानको दफा १७ (१) अनुसार सल्मा एचआर ओभरसिज प्रालिका सञ्चालक सोमबहादुर लामा, पासा इन्टरनेसनल प्रालिका सञ्चालक देवेन्द्रनारायण श्रेष्ठ, मोभिरा एचआर सर्भिस प्रालिका सञ्चालक अनिलकुमार राई र अजित म्यानेजमेन्ट डेभलपमेन्ट कम्पनी प्रालिका सञ्चालक सूर्यकुमार श्रेष्ठलाई सदस्यमा मनोनीत गरिएको संघका महासचिव एवं प्रवक्ता मेघराज भुर्तेलले बताए ।
संघको कार्यसमिति पूर्णतासँगै विभिन्न समिति गठन गरी जिम्मेवारीसमेत तोकिएको छ । संघको कार्यसमिति बैठकले पदाधिकारी तथा सदस्यहरूलाई विभिन्न समितिको जिम्मेवारी सुम्पेको हो ।
प्रथम उपाध्यक्ष डिकबहादुर खत्रीको संयोजकत्वमा राष्ट्रिय तथा अन्तर्राष्ट्रिय समन्वय समिति गठन गरिएको भने सदस्यहरुमा वैकुण्ठप्रसाद पौडेल, तोरणकुमार कार्की, अनिलकुमार राई, चन्द्रबहादुर लिम्बू, सोमबहादुर लामा, नारायण भुसाल, देवेन्द्रनारायण श्रेष्ठ र देउमान नेम्बाङ रहेका छन् । उनीहरुलाई श्रम गन्तव्य मुलकहरुमा आइपर्ने समस्या निराकरण लागि समन्वय गर्ने जिम्मेवारी तोकिएको छ ।
यस्तै वैदेशिक रोजगार कार्यालय र प्रहरी ब्युरो हेर्नेगरी द्वितीय उपाध्यक्ष सञ्जु गुरुङको संयोजकत्वमा अर्को समिति गठन भएको छ । यस समितिको सदस्यहरुमा बैकुण्ठप्रसाद पौडेल, चन्द्रबहादुर लिम्बू, कैलाश पाठक, राजेन्द्र बस्नेत र आनन्द कोइराला, बैकुण्ठप्रसाद पौडेल, चन्द्रबहादुर लिम्बू र सूर्यकुमार श्रेष्ठ रहेका छन् ।
त्यसैगरी तृतीय उपाध्यक्ष रोशन कटुवाललाई अतिरिक्त क्रियाकलाप समितिको संयोजक बनाइएको छ । उक्त समितिमा तोरण कार्की, देवेन्द्र नारायण श्रेष्ठ, देवीमाया थापा र विक्रम श्रेष्ठ सदस्य रहेका छन् । संघको महŒवपूर्ण मानिएको वैदेशिक रोजगार विभाग बुद्धनगर समन्वय समितिको संयोजकमा सचिव कर्णराज कटुवाललाई जिम्मेवारी तोकिएको छ ।
यस समितिको सदस्यहरुमा राजेन्द्र बस्नेत, सोमबहादुर लामा, कैलाश पाठक, देवनारायण श्रेष्ठ, चन्द्रबहादुर लिम्बू, आनन्द कोइराला, देवीमाया थापा र नारायण भुसाल रहेका छन् । संघको प्रवक्तामा महासचिव मेघनाथ भुर्तेललाई जिम्मेवारी दिइएको छ ।
यसैगरी संघको कार्यसमिति बैठकले वैदेशिक रोजगार बोर्डको सदस्य नियुक्तिका लागि कोषाध्यक्ष सरिता घलेलाई पठाउने सिफारिस गरेको छ । संघले सिफरिस गरेको प्रतिनिधिलाई श्रम, रोजगार तथा सामाजिक सुरक्षामन्त्रीले बोर्ड सदस्यमा नियुक्त गर्ने प्रावधान रहेको छ भने संघका अध्यक्ष बोर्डको पदेन सदस्य हुने व्यवस्था छ ।
महासचिव एवम् प्रवक्ता भुर्तेलले संघको कार्यसमितिले पूर्णता पाएसँगै देखिनेगरी केही कार्यहरु भएको भन्दै निर्वाचनका क्रममा व्यवसायीमाझ गरेका प्रतिवद्धताअनुसार वैदेशिक रोजगारका क्षेत्रमा सुधारका लागि गृहकार्य भइरहेको बताए । उनले सोही नीतिअनुरुप संघले परिणाम देखाउनेगरी काम गर्न विभिन्न समिति गठन गरी पदाधिकारी तथा सदस्यहरुलाई जिम्मेवारी तोकिएको जानकारी दिए ।
प्रकाशित मिति: सोमबार, फागुन १, २०७९ ०९:०६
-1745656903.jpeg)