काठमाडौं– सरकारले विदेशस्थित विभिन्न मुलुकमा रहेका नेपाली दूतावासमा वैदेशिक रोजगारीमा रहेका श्रमिकका लागि छुट्टै ‘हेल्प डेस्क’ (सहायता कक्ष) राख्ने निर्णय गरेको छ । श्रम, रोजगार तथा सामाजिक सुरक्षा मन्त्रालयको जिम्मेवारीसमेत सम्हालेका प्रधानमन्त्री पुष्पकमल दाहालको निर्देशनपश्चात् दूतावासहरूमा हेल्प डेस्क राख्ने निर्णय भएको हो ।
माघ पहिलो साता प्रधानमन्त्री दाहालले श्रमसचिवसहित मन्त्रालयका उच्च अधिकारीलाई बोलाएर वैदेशिक रोजगारीका क्रममा नेपालीले अनेकौं झमेला र सास्ती भोग्नुपरेको भन्दै समस्या समाधानका लागि डेस्क राख्न निर्देशन दिएका थिए । सोहीअनुसार गृहकार्य थालेको मन्त्रालयले विदेशस्थित विभिन्न मुलुकमा कार्यरत श्रमिक एवं कामदारको समस्या सम्बोधन गर्न छुट्टै ‘फोकल डेस्क’ राख्ने निर्णय गरेको मन्त्रालयले जानकारी दिएको छ ।
प्रधानमन्त्रीले दिएको चासो र निर्देशनकै आधारमा गृहकार्य गरेर विदेशमा रहेका नेपाली कामदारका समस्या समाधान गर्न सकियोस् भनेर ‘हेल्प डेस्क’ राख्ने निर्णय भएको मन्त्रालयका सचिव एकनारायण अर्यालले बताए । ‘सरकारको यो निर्णयले विदेशमा रहेका सम्पूर्ण श्रमिकको पेशागत हकहित, सुरक्षा र प्रवद्र्धनमा सहयोग पुग्ने विश्वास लिएका छौँ,’ उनले भने ।
विदेशस्थित विभिन्न मुलुकमा कार्यरत श्रमिक एवं कामदारको समस्या सम्बोधन गर्न छुट्टै ‘फोकल डेस्क’को व्यवस्थासम्बन्धी निर्णय भएको मन्त्रालयले जनाएको छ । ‘विभिन्न मुलुकमा कार्यरत नेपाली श्रमिकका समस्यालाई तत्काल सम्बोधन गर्न तथा समस्या समाधानमा थप सहजीकरण गर्नका लागि विदेशस्थित सबै नेपाली नियोगमा श्रमिकहरूका सबै प्रकारका समस्या सम्बोधन, सहजीकरण एवं मन्त्रालयमा प्रतिवेदन गर्न सबै नियोगमा श्रम डेस्क (लेबर डेस्क) स्थापना गरिनेछ,’ सरकारले गरेको निर्णयमा भनिएको छ । यस्तै निर्णयमा अगाडि भनिएको छ, ‘प्रभावकारी कार्यान्वयनका लागि यही माघ २५ गते प्रधानमन्त्री तथा श्रम, रोजगार तथा सामाजिक सुरक्षा मन्त्रीस्तरीय निर्णय भएको छ ।
त्यसैगरी परराष्ट्र मन्त्रालयमासमेत श्रमिकका समस्या समाधानार्थ समन्वय गर्न छुट्टै ‘डेडिकेटेड फोकल प्वाइन्ट’ तोकी कार्यारम्भ गर्ने निर्णय भएको छ । यसबाट विदेशस्थित विभिन्न मुलुकमा कार्यरत श्रमिकका समस्या तत्काल सम्बोधन हुने अपेक्षा गरिएको छ ।’
प्रकाशित मिति: सोमबार, फागुन १, २०७९ ०८:५३
-1745656903.jpeg)