काठमाडौं- वैदेशिक रोजगार विभागले एकभन्दा बढी म्यानपावर कम्पनीको सेयर भएका वैदेशिक रोजगार व्यवसायीमाथि कारबाही अगाडि बढाएको छ । विभागले बिहीबार एक सूचना प्रकाशित गरी एक व्यक्ति एउटाभन्दा बढी संस्थामा सेयर सदस्य हुन नपाउने र त्यस्तो कार्य वैदेशिक रोजगार ऐन–२०६४ विपरीत हुने जनाएको हाे ।
विभागले ‘एकाघर सगोलका परिवारका सदस्यको सेयर रहेको एकभन्दा बढी संस्थालाई इजाजतपत्र दिइने छैन’ भन्ने ऐनमा व्यवस्था रहेको उल्लेख गर्दै यदि त्यस्तो भए सात दिनभित्र सेयरको कागजातसहित विभागमा निवेदन पेस गर्न भनेको छ ।
‘वैदेशिक रोजगार ऐन, २०६४ को दफा ११ख मा एकाघर सगोलका परिवारका सदस्यको सेयर रहेको एकभन्दा बढी संस्थालाई इजाजतपत्र दिइने छैन भन्ने व्यवस्था रहेको सबैलाई विदितै छ,’ विभागको सूचनामा भनिएको छ, ‘उक्त कानुनी व्यवस्थाको बर्खिलाप हुनेगरी केही व्यक्तिहरु एकभन्दा बढी संस्थामा सेयर सदस्यको रुपमा रहेको भन्ने सुन्नमा आएको हुँदा यदि त्यस्तो रहेको भए एक मात्र संस्थाको सेयर सदस्य रहनेगरी यस विभागमा आवश्यक कागजातसहित सेयर दा.खा.का लागि यो सूचना प्रकाशन भएको मितिले सात दिनभित्र निवेदन पेस गर्नुहुन जानकारी गराइन्छ ।’
विभागले उक्त अवधिमा निवेदन पेस नगर्ने त्यस्ता म्यानपावर कम्पनीको कामकारबाही रोक्का गरी इजाजतपत्र खारेजीको प्रक्रिया अगाडि बढाउने चेतावनीसमेत दिएको छ । उक्त ऐनको दफा ११ख (२) मा ‘यो दफा प्रारम्भ हुँदाको बखत एकाघर सगोलका परिवारका सदस्यको सेयर रहेको एकभन्दा बढी संस्था भएमा यो दफा प्रारम्भ भएको मितिले छ महिनाभित्र एकआपसमा दफा ११क बमोजिम गाभिनुपर्ने उल्लेख छ ।
दफा ११क मा दुई वा दुईभन्दा बढी संस्था गाभिनेसम्बन्धी व्यवस्था रहेको छ । ऐनको दफा ११ख (२) को व्यवस्थाअनुसार एकै व्यक्तिले एकभन्दा बढी म्यानवापर कम्पनीको सेयर लिएको अवस्थामा त्यस्तो म्यानपावर कम्पनी ऐन प्रारम्भ भएको छ महिना पछि गाभिनुपर्ने थियो ।
तर, कतिपय व्यवसायीले उक्त ऐनको उल्लंघन गर्दै आएको पाइएको विभागको भनाइ छ । विभागले पनि बल्ल आएर कारबाही प्रक्रिया अगाडि बढाएको छ ।
सोही ऐनको दफा ११ख (३)मा त्यस्तो संस्था नवीकरण नहुने स्पष्ट उल्लेख गरिएको भए पनि वर्षौंदेखि नवीकरण भइरहेको देखिन्छ ।
यसले विभागकोसमेत कमजोरी रहेको देखाउँछ । उक्त ऐनअन्तर्गत दर्ता भएका म्यानपार कम्पनीहरुले वैदेशिक रोजगारीका लागि नेपाली श्रमिकलाई विभिन्न मुलुकमा पठाउँदै आएको छ । सरकारबाट इजाजतपत्र लिएका म्यानपावर कम्पनीहरुमध्ये करिब ८०० को संख्यामा हाल सञ्चालनमा रहेका छन् ।
