काठमाडौं- वैदेशिक रोजगारीका लागि रोमानिया, स्लोभाकियालगायतका युरोपेली मुलुकमा पठाइदिन्छु भन्दै विभिन्न व्यक्तिबाट रकम लिएर फरार रहेको आरोपमा प्रहरीले एक म्यानपावर कम्पनीका दुई जना सञ्चालकलाई पक्राउ गरेको छ ।
उक्त मुलुकमा पुगेपछि एक प्रतिष्ठित कृषि कम्पनीमा फ्रुट्सकिपिङको आकर्षक रोजगारी दिलाइदिने भन्दै ठगी गरेको आरोपमा ग्लोबल भिलेज सोर्स प्रालिका सञ्चालक हरी बस्नेत र हेमलाल पुन मगरलाई प्रहरीले पक्राउ गरेको हो ।
उनीहरुले युरोपेली मुलुक मात्र नभई खाडी मुलुकमासमेत आकर्षक रोजगारीको प्रलोभन देखाइ ठगी गरेको प्रहरीले जनाएको छ । युरोप तथा खाडीका मुलुकमा आकर्षक रोजगारी र मासिक एक लाख रुपैयाँभन्दा बढी आम्दानी हुने लोभ देखाएर प्रतिव्यक्ति पाँच लाख रुपैयाँ लाग्ने भन्दै पीडितहरुसँग पटक–पटक गरी ३१ लाख ९० हजार रुपैयाँ ठगी गरेको अभियोगमा प्रहरीले पक्राउ गरेको जनाएको छ ।
पक्राउ पर्नेमा टोखा बस्ने खोटेहाङ गाउँपालिका–९, खोटाङ स्थायी घर भएका ४० वर्षीय हरी र काठमाडौं तार्केश्वर बस्ने गौमुखी नगरपालिका–७ प्युठान स्थायी घर भएका हेमलाललाई उपत्यका अपराध अनुसन्धान कार्यालयबाट खटिएको प्रहरी टोलीले तार्केश्वरबाटै पक्राउ गरेको जनाएको छ ।
पीडितबाट रकम संकलन गरी सम्पर्कसमेत नगरी फरार रहेको अवस्थामा उनीहरुलाई प्रहरीले पक्राउ गरेको हो ।वैदेशिक रोजगार विभागले उल्लिखित म्यानपारका सञ्चालक बस्नेत र मगरलाई पक्राउ गरी उपस्थित गराइदिन आग्रह गर्दै पत्राचार गरेपछि प्रहरीले पक्राउ गरेको अपराध अनुसन्धान कार्यालयका सूचना अधिकृत प्रहरी उपरीक्षक कृष्णप्रसाद कोइरालाले जानकारी दिए । उनका अनुसार पक्राउ परेका दुवै जनालाई थप अनुसन्धान तथा कारबाहीका लागि विभागमा बुझाइएको छ ।
प्रकाशित मिति: मंगलबार, माघ २४, २०७९ ०९:१२
-1745656903.jpeg)