काठमाडौं – वैदेशिक रोजगारीका लागि युरोपेली मुलुक फ्रान्स पठाइदिन्छु भन्दै विभिन्न व्यक्तिबाट रकम लिएर फरार रहेको आरोपमा प्रहरीले एक जनालाई पक्राउ गरेको छ ।
फ्रान्स पुगेपछि एक प्रतिष्ठित कृषि कम्पनीमा ‘फ्रुट्स किपिङ’को आकर्षक रोजगारी दिलाइदिने भन्दै ठगी गरेको आरोपमा प्रहरीले तेजेन्द्र महतलाई पक्राउ गरेको हो ।
फ्रान्समा रोजगारी र आकर्षक आम्दानी हुने लोभ देखाएर प्रतिव्यक्ति १० लाख रुपैयाँ लाग्ने भन्दै पीडितसँग पटक–पटक गरी १९ लाख रुपैयाँ ठगी गरेको अभियोगमा काठमाडौंको सतुंगल बस्ने शुक्लागण्डकी नगरपालिका–८ तनहुँ घर भएका ४६ वर्षीय महतलाई गत बुधबार प्रहरीले पक्राउ गरेको हो ।
उनलाई उपत्यका अपराध अनुसन्धान कार्यालयबाट खटिएको प्रहरी टोलीले सतुंगलबाटै पक्राउ गरेको जनाएको छ । महतले राजेन्द्र राना मगरसमेत गरी तीन जनाबाट फ्रान्समा रोजगारी र अकर्षक तलब हुने भनी प्रलोभनमा पारेर उल्लेखित रकम लिएर फरार भएको बताइएको छ ।
पीडितबाट रकम संकलन गरी सम्पर्कसमेत नगरी फरार रहेको अवस्थामा उनलाई प्रहरीले पक्राउ गरेको हो ।वैदेशिक रोजगार विभागले महतलाई पक्राउ गरी उपस्थित गराइदिन आग्रह गर्दै पत्राचार गरेपछि प्रहरीले पक्राउ गरेको अपराध अनुसन्धान कार्यालयका सूचना अधिकृत प्रहरी उपरीक्षक कृष्णप्रसाद कोइरालाले जानकारी दिए ।
उनका अनुसार पक्राउ परेका महतलाई थप अनुसन्धान तथा कारबाहीका लागि विभागमा बुझाइएको छ ।विदेशमा आकर्षक तलब प्राप्त हुने लोभमा फस्दा नेपालीहरु दैनिकजसो ठगिँदै आएको विभागका निर्देशक एवं सूचना अधिकारी कृष्णप्रसाद भुसालले बताए । पछिल्लो समय ठगीका घटना बढ्दै गएको भन्दै भुसालले विभागमा थुप्रै उजुरी पर्ने गरेको र नेपाल प्रहरीको समन्वयमा ठगीमा संलग्नहरुलाई पक्राउ गरिरहेको बताए ।
