काठमाडौं - मलेसियामा रोजगारीका लागि गएका नेपाली श्रमिकको सुविधाका लागि नेपाली दूतावासले घुम्ती सेवा सञ्चालनमा ल्याएको छ । मलेसियाका विभिन्न सहरमा काम गरिरहेका श्रमिकहरुलाई दूतावासले सेवासुविधा दिने उद्देश्यले घुम्ती सेवा सञ्चालनमा ल्याइएको दूतावासले जनाएको छ ।
राजधानी क्वालालम्पुरबाट झण्डै चार घण्टाको दूरीमा रहेको जोहरवारु सहरमा बुधबारदेखि दूतावासले अस्थायी घुम्ती सेवा सञ्चालनमा ल्याएको छ । उक्त घुम्ती सेवाको उद्घाटन राजदूत डिल्लीराज पौडेलले गरेका थिए ।
मलेसियास्थित गैरआवासीय नेपाली संघ र अन्य नेपाली संघ संस्थाहरुसँगको सहकार्यमा घुम्ती सेवा सञ्चालन गरिएको राजदूत पौडेलले बताए । घुम्ती सेवा उद्घाटनका क्रममा सहभागी नेपाली श्रमिकहरुसँग आफूले पाइरहेको सेवासुविधा र कार्यरत कम्पनीहरुको अवस्थाका बारेमा राजदूत पौडेलले जानकारीसमेत लिएका थिए ।
उनले नेपाली श्रमिकहरु कार्यरत केही कम्पनीको स्थलगत निरीक्षण एवं सम्बन्धित कम्पनी व्यवस्थापनसँग पनि छलफल गरेको बताइएको छ । विशेषतः सुरक्षा गार्ड तथा सरसफाइसम्बन्धी कम्पनीहरुमा कार्यरत नेपाली श्रमिकहरुको गुनासो आएपछि राजदूत पौडेलले कम्पनी व्यवस्थापनसँग समस्या समाधानका लागि छलफल गरेको दूतावासले जनाएको छ ।
सुरक्षा गार्ड र सरसफाइसम्बन्धी श्रमिकको समस्या समाधानका लागि दुई देशबीच सन् २०१८ मा भएको श्रम सम्झौता र मलेसियाको श्रम कानुनअनुसार व्यवस्थित गर्न लागिएको राजदूत पौडेलले बताए । उनका अनुसार नेपाली श्रमिक कार्यरत तथा नेपाली श्रमिक माग गर्ने कम्पनीका व्यवस्थापनलाई आवश्यकता परेको खण्डमा दूतावासमा बोलाएरसमेत छलफल गर्ने गरिएको छ ।
मागपत्रमा उल्लेख भएअनुरुप श्रमिकले पाउनुपर्ने आवास सुविधा, पारिश्रमिक र कार्य समयलाई अक्षरशः पालना गराउन दूतावास कटिबद्ध रहेको जनाएको छ । श्रमिकहरुको सम्मान तथा सेवा सुविधामा सहयोग पु¥याउन आवश्यक कार्य भइरहेको र हाल सुरक्षा गार्ड तथा सरसफाइसम्बन्धी मागपत्र प्रमाणीकरणमा केही ढिला भएको दूतावासले उल्लेख गरेको छ ।
घुम्ती सेवा उद्घाटनका अवसरमा राहदानीलगायतका दूतावासबाट प्रवाह गरिने विभिन्न सेवाहरु प्रदान गरिएको दूतावासले जनाएको छ । एक हजारभन्दा बढी नेपाली उपस्थित भएको कार्यक्रममा २८० जनाभन्दा बढी नेपाली श्रमिकले राहदानीसम्बन्धी सेवा लिएका थिए ।अहिले मलेसियाले आप्रवासी कामदारको चर्को अभाव खेपिरहेको छ । यही बेला नेपालबाट रोजगारीका लागि मलेसिया जाने नेपालीहरुको संख्यामा उल्लेख्य वृद्धि भएको छ ।
सुरक्षा गार्ड, कृषि, औद्योगिक क्षेत्र, सेवा क्षेत्रलगायतका क्षेत्रमा नेपालीहरुको बाक्लो उपस्थिति रहेको बताइन्छ । चालु आर्थिक वर्षको पहिलो तीन महिनामा मात्रै नेपालबाट ८५ हजारभन्दा बढी कामदार मलेसिया पुगेको वैदेशिक रोजगार विभागको तथ्यांकले देखाएको छ । उल्लिखित क्षेत्रमा नेपाली कामदारको माग उच्च रहेको दूतावासले उल्लेख गरेको छ । रोजगारीको अवसर बढेसँगै समस्याहरु पनि थपिने भएकाले यसको निराकरणका लागि निरन्तर पहल भइरहने दूतावासले प्रतिबद्धता जनाएको छ ।
