काठमाडौं- श्रम, रोजगार तथा सामाजिक सुरक्षा मन्त्रालयले वैदेशिक रोजगारसम्बन्धी प्रवाह गरिने सबै सेवाहरु अनलाइन प्रणालीबाट हुने जनाउँदै बिचौलियाको पछि नलाग्न आग्रह गरेको छ ।
मन्त्रालयले बुधबार एक विज्ञप्ति जारी गर्दै अनलाइनमार्फत प्राप्त हुने कामका लागि सेवाप्रदायक कार्यालयमा भौतिकरुपमा उपस्थित भई भीडभाड गर्ने र अनावश्यक समस्या सिर्जना गर्ने र दबाब दिने कार्य भएकोमा ध्यानाकर्षण भएको भन्दै यस्तो सेवा प्रवाहका क्रममा बिचौलिया वा अन्य कुनै व्यक्तिको प्रभावमा नपर्न आग्रह गरेको हो ।
हाल सेवाग्राहीको नाममा बिचौलिया कार्यस्थलमा प्रवेश गरी कर्मचारीलाई कार्यसम्पादनमा असर गर्ने, विधि र प्रक्रिया नमिलेका काम गर्न अनेकन दबाब दिने, प्रलोभनमा पार्न प्रयत्न गर्ने र आफ्नो निहित स्वार्थ पूरा नहुँदा कार्यालयको काम कारबाहीप्रति नकारात्मक टिप्पणी गर्ने प्रवृत्ति बढेको मन्त्रालयले जनाएको छ ।
वैदेशिक रोजगार विभाग र वैदेशिक रोजगार कार्यालयबाट प्रवाह गरिने सबै सेवा अनलाइन प्रणालीमा आबद्ध गरिएको विज्ञप्तिमा उल्लेख गरिएको छ ।
मन्त्रालयले विभाग र रोजगार कार्यालयबाट हुने सेवा प्रवाहको निरन्तर प्रणालीमार्फत तथा स्थलगतरुपमा अनुगमन गर्ने सेवा प्रवाह र गुनासो सम्बोधन सम्बन्धमा सघनरुपमा छलफल गरी सोको निराकरण मिलाएको जनाएको छ ।
विभाग र कार्यालयबाट सेवा प्राप्त गर्न स्वदेश तथा विदेशमा रहेका सेवाग्राहीले भौतिकरुपमा उपस्थित हुन नपर्ने गरी व्यवस्था मिलाइएको मन्त्रालयका उपसचिव एवं सहायक प्रवक्ता डा. थानेश्वर भुसालले बताए । उनले कानुनबमोजिम लाग्ने दस्तुर अनलाइन प्रणालीबाटै भुक्तानी गर्ने व्यवस्था मिलाइएको जानकारी दिए ।
