काठमाडौं- श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा रहेका नेपालीहरुलाई समयमै श्रम स्वीकृति नवीकरण गर्न आग्रह गरेको छ । प्रचलित वैदेशिक रोजगार ऐन, २०६४ बमोजिम वैदेशिक रोजगारीमा जाने नेपाली नागरिकले अनिवार्यरुपमा श्रम स्वीकृति लिनैपर्ने व्यवस्था रहेको जानकारी गराउँदै मन्त्रालयले रोजगारीमा रहँदै वा पुनः विदेश जानुपर्ने भएमा श्रम स्वीकृतिको अवधि समाप्त हुने अवस्थामा नवीकरण गरिहाल्न आग्रह गरेको हो ।
‘एकपटक श्रम स्वीकृति लिई विदेशमा रोजगारीमा गएपछि श्रम स्वीकृतिको अवधि कायमै रहेको अवस्थामा नेपालमा फर्की पुनः सोही मुलुकको सोही काममा जाँदा पुनः श्रम स्वीकृति लिनु नपर्ने तर एकपटक लिएको श्रम स्वीकृतिको अवधि समाप्त भएपछि पुनः विदेशमा रोजगारीको लागि जानुपरेमा श्रम स्वीकृति नवीकरण गर्नुपर्ने कानुनी व्यवस्था छ,’ मन्त्रालयले सोमबार जारी गरेको विज्ञप्तिमा भनिएको छ ।
मन्त्रालयले श्रम स्वीकृति नवीकरणमा सचेत गराउँदै श्रम स्वीकृतिको अवधि सकिएपछि विदेशमा कुनै पनि कारणले मृत्यु भएमा वा अन्य कुनै अकल्पनीय घटना भई गम्भीर बिरामी भएमा कानुनबमोजिम वैदेशिक रोजगार कल्याणकारी कोषको रकम र बिमाबापतको रकम दाबी गर्नसक्ने कानुनी अवस्था नरहने स्पष्ट गरेको छ ।
वैदेशिक रोजगार ऐन,२०६४ ले व्यवस्था गरेअनुरुप वैदेशिक रोजगारीमा रहँदा भवितव्य परी मृत्यु भएमा श्रम स्वीकृति लिँदा वैदेशिक रोजगार कल्याणकारी कोषमा दाखिला गरेको रकम र विदेश जानुपूर्व नेपालमा नै गरेको बिमाबाटै शवको व्यवस्थापन गर्ने र परिवारलाई कानुनले तोकेबमोजिमको सेवा सुविधा प्रदान गर्ने व्यवस्था रहेको मन्त्रालयका उपसचिव एवं सहायक प्रवक्ता डा. थानेश्वर भुसालले बताए ।
उनका अनुसार श्रम स्वीकृतिको अवधि सकिएपछि विदेशमा कुनै पनि कारणले मृत्यु भएमा वा अन्य कुनै अकल्पनीय घटना घटी गम्भीर बिरामी भएमा कानुनबमोजिम वैदेशिक रोजगार कल्याणकारी कोषको रकम र बिमाबापतको रकम दाबी गर्न सक्ने कानुनी व्यवस्था छैन ।मन्त्रालयले विदेशमा रोजगारीका लागि गएका नेपालीहरुले आफूले लिएको श्रम स्वीकृतिको अवधि समाप्त हुनअघि नै वैदेशिक रोजगार विभागको वेबसाइटमार्फत सम्बन्धित मुलुकबाट नै श्रम स्वीकृति नवीकरण गर्न सक्ने जनाएको छ ।
प्रचलित कानुनबमोजिम नवीकरण गरी आफू र आफ्नो परिवारले पाउने कल्याणकारी सेवा सुविधा उपभोग गर्न÷गराउन पनि मन्त्रालयले विज्ञप्तिमार्फत अपिल गरेको छ । यसका लागि वैदेशिक रोजगार कल्याणकारी कोष र बिमाबापत दाखिला गर्ने रकम सम्बन्धित देशमा रहेको आफ्नो बैंक खाताबाट सोझै नेपालमा रहेको वैदेशिक रोजगार बोर्ड र सम्बन्धित बिमा कम्पनीको खातामा सोझै पठाउन सकिनेगरी व्यवस्था मिलाइएको मन्त्रालयले उल्लेख गरेको छ ।
रोजगारीमा रहेका नेपालीले आफ्नो श्रम स्वीकृतिको म्याद रहे÷नरहेको थाहा पाउन विभागको वेबसाइटमा गई जाँच गर्न सक्ने मन्त्रालयले जनाएको छ ।समयमै श्रम स्वीकृति नवीकरण नगर्दा विदेशमा रोजगारीका सन्दर्भमा विभिन्न पीडा खेप्नुपर्ने, स्वदेश फर्कन कठिन हुने र कतिपय परिस्थितिमा जेल सजायसमेत भोग्नुपर्ने अवस्था आउने गरेको भुसालको भनाइ छ ।
‘मलेसियालगायत खाडी मुलुकमा रोजगारीका लागि गएका थुप्रै नेपालीहरुमा समयमै श्रम स्वीकृति नवीकरण नगर्दा विभिन्न समस्या भएको गुनासा आउने गरेका छन्,’ उनले भने, ‘अहिले पनि श्रम स्वीकृति नवीकरण नभएका वा भिसा अवधि नाघेका थुप्रै नेपालीहरु विदेशमा अलपत्र परेका खबरहरु आइरहेका छन् ।’
विदेश गएकाहरुले सहजरुपमा राज्यले दिएको सेवा सुविधाको उपभोग गर्न पाउन् र विविध कारणले अलपत्र परेकाहरुको उद्धारमा कठिनाइ नहोस् भन्ने अभिप्रायले श्रम स्वीकृति नवीकरणका सन्दर्भमा जानकारीका लागि मन्त्रालयले विज्ञप्ति जारी गरेको भुसालले बताए ।
