काठमाडौं– फिनल्याण्डको एक जिल्ला अदालतले मानव तस्करी तथा श्रम शोषणको मुद्दामा एक नेपाली दम्पतीलाई जेल सजाय तोकेको छ ।
त्यहाँको पिर्कनमा जिल्ला अदालतले आफ्नो रेस्टुरेण्टमा काम गर्ने श्रमिकहरुको श्रम शोषण गरेको मुद्दामा दोषी ठहर गर्दै डिलाराम सापकोटा तथा उनकी श्रीमती रिमा सापकोटालाई जेल सजाय तोकेको हो ।
गुल्मी घर भई लामो समयदेखि फिनल्याण्डमा रेस्टुरेण्ट व्यवसायमा संलग्न सापकोटा दम्पतीले आफ्नो रेस्टुरेण्टमा श्रम शोषण भइरहेको भन्दै एक नेपाली कामदारले उजुरी गरेपछि प्रहरीले छानबिन गरेर सापकोटा दम्पतीविरुद्ध मुद्दा चलाएको त्यहाँको सञ्चारमाध्यम हेलसिंगिन सानोमतले जनाएको छ ।
उक्त समाचारका अनुसार रेस्टुरेण्ट मालिक सापकोटालाई तीन वर्ष आठ महिना तथा उनकी श्रीमती रिमालाई दुई वर्ष १० महिना जेल सजाय सुनाउँदै तत्काल जेल चलान गरिएको छ ।
उनीहरुले फिनल्याण्डको राजधानी हेलसिन्कीबाट झण्डै डेढ घण्टा टाढा रहेको ताम्पेरे सहरस्थित आफ्नो रेस्टुरेण्टमा नेपाली कामदारहरु लैजाने, बिहानदेखि राति अबेरसम्म हप्तामा पूरै दिन काममा लगाउने गरेको प्रहरी अनुसन्धानले देखाएको जनाइएको छ ।
अदालतले सापकोटा दम्पतीले चार जना नेपालीलाई मानव तस्करी गरेको र थप दुई जनालाई काममा भेदभाव गरेको ठहर गर्दै श्रम शोषण गरिएका कामदारहरुलाई ज्याला, उनीहरुले पाएको पीडाबापत लाखौं युरो क्षतिपूर्ति दिन पनि आदेश दिएको छ ।
फिनल्याण्डमा सञ्चालित अन्य नेपाली रेस्टुरेण्ट सञ्चालकहरुले पनि नेपालबाट कामदार लैजाने र आफ्नो अनुकुल काम लगाएर श्रम शोषण गर्ने गरेको उजुरी फिनिस प्रहरीमा परेको जनाइएको छ । ती उजुरीहरुमाथि पनि छानबिन भइरहेको समाचारमा उल्लेख छ ।
प्रकाशित मिति: आइतबार, कात्तिक २७, २०७९ ०९:३०
-1745656903.jpeg)